Kənan Hacıyla tanışlığım nə vaxt olub, düzü heç yadıma gəlmir. Yaradıcı adamlar bir-biri ilə necə, nə vaxt tanış olublar, bir-birlərini nə vaxtdan taınıyırlar, bəlkə də çoxları bunu xatırlamır. Önəmli olan bir-birini tanımaqdır. Mən Kənanı dərindən, içdən tanıyıram. Və həm də uzun müddətdir taınıyıram. Sözün açığı deyim ki, tək mən yox, başqa həmkarlarımız da darıxanda Kənanı axtarıb tapırıq. Sanki, Kənan darıxanlar üçün “Təcili yardım” rolunu oynayır. Dünyanın gərdişindən uzaq, bəzən də maddi çətinliklər içində öz ədəbi hücrəsində var-gəl edən Kənan Hacının hamının kədərinə “yetişməsi” dərdi, qəmi bütün varlığıyla hiss etməsindən, ürəyi kövrəkliyindən irəli gəlir. Dərdini danışırsan, səni dinləyir, anlayır, sənə qoşulub kövrəlir, bir sözlə sənə əsl həmdərd olur. Amma 50 yaşlı dostumuz təkcə qəmli, kədərli deyil, olduqca pozitiv və nikbindir. Problemlərin içində itib-batsa da, səhhətində narahatlıqlar olsa da həyata, yaşamağa olan ümidini itirmir, hətta o ümiddən sənə də pay verir.

Hamıya dərd ortağı olan Kənan Hacının 50 yaşı tamam olur. Rəqəmləri gözə almasam 50 yaş məsələsini heç cürə ona yaraşdıra bilmərəm. Di gəl ki, reallıq Əlisəmid Kür kimi dörd tərəfdən adamın üstünə gəlir. Fakt budur ki, 50 yaş ortadadır. Yaradıcı adam üçün, xüsusən də yazarlar üçün yaşın artamsı müdrikləşmək, daha da peşəkarlaşmaqdır. Odur ki, dostumuz 50 məsələsini təbriklər və arzular “janrında” qəbul edib öz yaradıcılq yoluna sadiq qalmaqla yazamağa davam etməlidir.

Kənan Hacını çoxsaylı ədəbi xasiyyəti var. Birini qeyd etməsm olmaz məncə. Onun kitab “xəstəliyini” yaxın dostları və ətrafı daha yaxşı bilir. Kitaba həssas olan yubiliyar harda kitab görsə əldə etməyə, oxumağa çalışır. Məsələn ona desən ki, Lökbatanda və ya Qala kəndində filan kitab satılır, alıb oxusan yaxşı olar. Cibində olan son manatlıqlarını yolpulu edər, həmin kitabı alar. Pulu olmasa da, özü demiş “nolda” olsa da, dost-tanışdan borc alıb kitabı əldə edər. Yox əgər həmin gün fələyin çərxi tərs gətirib Kənanı pulsuz qoysa, inanın ki, bütün günü narahatlıq içində vurnuxar, qanı “it qanına” dönər. Mənim tanıdığım Kənan Hacı belə Kənan Hacıdır.