Qul olmasın

Başını əyməsin zirvəli dağlar,
Kişilər namərdə qul olmasın kaş.
Kimsənin gözləri qalmasın ağlar,
Bir qadın gənc ikən dul olmasın kaş.

Çalış qədrini bil həyatın, canın,
Boş yerə getməsin zamanın, anın...
Nə qədər həyat var, Allah, insanın,
Amalı, niyyəti pul olmasın kaş.

Qoy gülsün çöhrəsi hər oğlun, qızın,
Gözəllər eyləsin işvəsin, nazın.
Xoş ətri yayılsın baharın, yazın,
Solan bağça-bağlar, gül olmasın kaş.

Anar, bu Vətənin bil ki hər zaman,
Qızı qeyrətlidir, oğlu qəhrəman.
Yurdumun başını almasın duman,
Yanar ocağımız kül olmasın kaş.


Adamlar bənzəmir bir-birinə

Adam var, adama "dədə"lik edir,
Adam var, namərddir, gədəlik edir,
Adam var, hər yükə "dəvə"lik edir;
Adamlar bənzəmir biri-birinə.

Gül gülə bənzəyir, yarpaq yarpağa,
Dağ dağa bənzəyir, torpaq torpağa.
Adam var, can atmır insan olmağa;
Adamlar bənzəmir biri-birinə.

Adam var, taxt qurur alın təriylə,
Adam var, qəlb qırır zülm, şəriylə.
Adam var, dərd yeyir adam əliylə;
Adamlar bənzəmir bir-birinə.

Dünya yaranandan bu insan oğlu -
Kimə doğru olub, kiməsə oğru.
Anar, adamlardan özünü qoru,