Xəzər Universitetində Dillər və ədəbiyyatlar departamentinin təşkilatçılığı ilə görkəmli təhsil qurucusu, riyaziyyatçı-alim, şair-publisist, tərcüməçi, Xəzər Universitetinin təsisçisi, Direktorlar və Qəyyumlar Şurasının sədri professor  Hamlet İsaxanlının anadan olmasının 75 illiyinə həsr olunan “Humanitar elmlər  yeni paradiqmalar kontekstində”  Gənc Tədqiqatçıların Beynəlxalq Elmi Konfransı keçirilmişdir. Konfransda universitetin rəhbərliyi,  ölkəmizdən və dünyanın birsıra ölkələrindən (Rusiya, Qazaxıstan, Türkiyə, Niderland, İngiltərə, Polşa)  tədqiqatçılar, həmçinin əməkdaşlar, tələbələr iştirak etmişlər.

Tədbir Dövlət Himninin səsləndirilməsi ilə başlamış, Dillər və ədəbiyyatlar departamentinin müdiri dosent Dilbər  Zeynalova açılış nitqi ilə qonaqları salamlamışdır.

Tədbir Xəzər Universitetinin Kamera orkestrinin çıxışı ilə davam etmişdir.  Orkestrin çıxışından sonra universitetin rektoru dosent İradə Xəlilova iştirakçılara öz təşəkkürünü bildirmiş, konfransın işinə uğurlar arzulamışdır.  Daha sonra İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin rəisi Məmməd Abbasbəyli, AMEA Dilçilik İnstitutunun direktoru prof.  Nadir Məmmədli, şair, nasir, tərcüməçi İmir Məmmədli çıxış etmişlər. Bundan başqa, Beynəlxalq Rektorlar Assosiasiyasının Prezidenti,  Gürcüstanda Qafqaz Universitetinin rektoru  prof. Kaxa Şenqelia,  Ərdahan Universitetinin sabi rektoru, Qırğızıstan-Türkiyə Manas Universiteti Qəyyumluq Şurasının üzvü, Qafqaz Universitetlər Birliyinin sədri prof. Ramazan Qorxmaz, şair, yazıçı-tərçüməçi, Avrasiya Yazarlar Birliyinin, Dünya Gənc Türk Yazarlar Birliyinin və Azərbaycan Yazıçılar Birliyinin üzvü İmdad Avşar və Özbəkistan İpək yolu Universitetinin prorektoru prof. Bahadur Turayev tədbirə onlayn formada qoşularaq prof. Hamlet İsaxanlını 75 illiyi münasibətlə təbrik etmişlər. Sonda Xəzər Universitetinin təsisçisi, Direktorlar və Qəyyumlar Şurasının sədri prof. Hamlet İsaxanlı iştirakçılara təşəkkür edərək konfransın işinə uğurlar arzulamışdır. 

Konfransda prof. Hamlet İsaxanlının bədii yaradıcılığı ilə yanaşı dil, ədəbiyyat, tarix, mədəniyyət, təhsil tarixi və fəlsəfəsi istiqamətləri üzrə də çıxışlar dinlənilmişdir. Konfransın ikinci hissəsi elmi panellərlə - dosent Nəzakət Məmmədli, Xəzər Universitetinin Tarix və arxeologiya departmetinin müəllimi t.ü.f.d Söhrab Mustafayev, Universitetin Dillər və ədəbiyyatlar departamentinin müəllimləri fil.ü.f.d Zəminə Ziyayeva, dosent XatirəYusifova, fil.ü.f.d Ülvi Babasoy və Yeqzar Cəfərlinin moderatorluğu ilə davam etmişdir.