Əziz dostlar!

Hər birinizi Türk xalqlarının milli-mənəvi yaddaşının ayrılmaz parçası olan, yaradılışı, oyanışı, canlanmanı simvolizə edən Novruz Bayramı münasibətilə ürəkdən təbrik edirəm!

Novruz özündə cəmləşdirdiyi humanizm, sülh, mənəviyyat ideyaları ilə ali insani dəyərlərə gözəl ərmağandır və bəşəriyyətə xidmət etməkdədir. Bu bayrama məxsus ənənə və adətlərdə ata-babalarımızın hikmət, müdriklik və əxlaq təntənəsi əks olunmaqdadır. Sədası qədim çağlardan gələn Novruz Türk xalqlarının etnik-mədəni irsində dərin kök salmış fəlsəfi düşüncələrin - gələcəyə ümidlə baxmağın, yeni başlanğıclara inanmağın, xoş arzu və niyyətlərin bayramıdır. Keçmişin çətin sınaqlarından üzü ağ çıxaraq, dirçəlməyin və yenilənməyin rəmzidir.

Müasir dövrdə Türk dövlətləri bir-birləri ilə dostluq və qardaşlıq bağlarını qürurla yaşadaraq, ortaq tarixdən və mədəniyyətdən gələn əmanətlərinin ətrafında sədaqətlə birləşməkdədirlər. Türk xalqlarına əcdadlarından yadigar qalmış miraslardan biri olan Novruz irsi onları kömək əli uzatmağa, maddi – mənəvi dəstəyə, əbədi birlik və həmrəyliyə, Tək Ürək olmağa səsləyir.

Beynəlxalq Türk Mədəniyyəti və İrsi Fondu adından Türk Dünyasını Bahar bayramı münasibətilə təbrik edir, sağlamlıq, firəvanlıq, bol ruzi, bərəkət, səadət arzulayıram!