AMEA-nın akademik Ziya Bünyadov adına Şərqşünaslıq İnstitutunun “Şərq araşdırmaları” elmi-nəzəri jurnalının növbəti sayı işıq üzü görüb.

İnstitutdan bildirilib ki, jurnalda ədəbiyyat, dilçilik, tarix, etnoqrafiya, siyasi elmlər və fəlsəfə sahələrinə aid elmi məqalələr dərc olunub. Jurnalda qloballaşma prosesində türk yazıçıların Almaniyada multikultural ədəbiyyatşünaslığın inkişafındakı rolu, Nizami və Şərq folklor ənənələri barədə, eləcə də Ali Ayçilin “Sehrbaz Seyfəddinin son sehri” adlı hekayəsinin təhlilinin aparıldığı məqalələr yer alıb. Yunus Əmrə divanında ərəb-fars mənşəli sözlərdən bəhs edilən məqalə təqdim olunur.

“Fəlsəfə” bölməsində Azərbaycan Respublikasında dövlət gənclər siyasətinin başlıca istiqamətləri və vəzifələrindən, Həmzə Nigarinin dini-etik görüşlərindən bəhs edən yazılar da yer alıb. Jurnalın “Tarix, etnoqrafiya və siyasi elmlər” bölməsində də maraqlı məqalələr verilib.