Azərbaycan Milli Elmlər Akademiyasının (AMEA) Nizami Gəncəvi adına Ədəbiyyat İnstitutunda görkəmli ədəbiyyatşünas alim, Əməkdar elm xadimi, professor Kamran Məmmədovun anadan olmasının 100 illik yubileyinə həsr edilən konfrans keçirilib.

Tədbirdə çıxış edən AMEA-nın prezidenti akademik İsa Həbibbəyli görkəmli alim Kamran Məmmədovun XX əsr ədəbiyyatının tədqiqində, ədəbiyyatşünaslığın inkişafında xüsusi və önəmli yeri olan vətənpərvər ziyalılardan biri kimi unudulmazlıq qazandığını bildirib. O, Kamran Məmmədovun ədəbiyyat tarixində rolunun təkcə bədii mətnlərlə bağlı olmadığını, alimin, eyni zamanda, mühüm arxiv sənədləri, faktlar üzərində işlədiyini diqqətə çatdırıb.

“Professor Kamran Məmmədov ömrünün sonlarına qədər arxivlərdən dəyərli materiallar toplayıb, onları dövri mətbuatda ədəbi ictimaiyyətə təqdim edib”, - deyə AMEA prezidenti bildirib.

Qeyd edilib ki, təbii və özünəməxsus xarakteri ilə seçilən, bütöv bir şəxsiyyət kimi yaddaşlarda yaşayan ədəbiyyatşünas alim Kamran Məmmədov vətənpərvərlik, azərbaycançılıq ideyalarına böyük önəm verib, bu mövqeyini əsərlərində də əsas götürüb. O, həmçinin II Dünya müharibəsinin iştirakçısı olub.

AMEA rəhbəri görkəmli alim Kamran Məmmədovun əsərlərinin bugünkü dövrdə də öz aktuallığını qoruyub saxladığını, özünəməxsusluğu ilə seçildiyini vurğulayıb.

Kamran Məmmədovun uzun müddət Ədəbiyyat İnstitutunda şöbə müdiri kimi fəaliyyət göstərdiyini deyən akademik İ.Həbibbəyli onun çoxlu sayda yetirmələrinin olduğunu qeyd edib.

Sonra professorlar Tahirə Məmməd “XIX-XX əsrlər Azərbaycan ədəbiyyatının görkəmli tədqiqatçısı”, İslam Qəribli “Kamran Məmmədovun araşdırmalarında XX əsr Azərbaycan bədii gülüşünün tədqiqi”, Asif Rüstəmli “Kamran Məmmədov ədəbiyyat tarixçisi kimi”, dosent Gülbəniz Babayeva “Alimin elmi irsində satira məsələləri”, filologiya üzrə fəlsəfə doktoru Əsmər Hüseynova “Kamran Məmmədovun bədii yaradıcılığı” mövzularında məruzələrlə çıxış ediblər.

Akademik Muxtar İmanov, professor İmamverdi Həmidov və digər alimlər də Kamran Məmmədovun yaradıcılığından söhbət açıb, onunla bağlı xatirələrini bölüşüblər.

Ədəbiyyatşünas alimin qızı, filologiya elmləri doktoru Leyla Məmmədova tədbirin təşkilatçılarına və iştirakçılarına təşəkkürünü bildirib.