Şair, jurnalist Vasif Əlihüseynin şəhidlərə həsr etdiyi “Cənnət yolçuları” adlı kitabı çapdan çıxıb. Kitab “Elm və təhsil” nəşriyyatında 100 tirajla çap olunub.

Avanqard.net xəbər verir ki, kitabda jurnalistin Cəlilabadın Muğan, Maşlıq, Söyüdlü və Kazımabad kəndlərinin birinci Qarabağ savaşında, atəşkəs dövründə və 44 günlük Vətən müharibəsində şəhid olan hərbçilərimiz haqda hazırladığı yazıları toplanıb.

Müəllif deyib ki, kitabın qarşıdakı günlərdə Cəlilabad rayon Muğan kənd orta məktəbində təqdimatı olacaq. Təqdimata kitabda yer alan şəhidlərin valideynləri, qazilər və rayon rəsmiləri dəvət olunacaq.

Qeyd edək ki, Vasif Əlihüseyn Əlifağa oğlu 1985-ci ildə Cəlilabad rayon Muğan kəndində anadan olub. Moskva Sosial Dövlət Universitetinin filologiya və Bakı Slavyan Universitetinin yaradıcılıq fakültələrini bitirib. Azərbaycan Yazıçılar Birliyinin üzvüdür. “Ayrılığın rəngi” və “Divara yazılmış azadlıq sözü” şeir və esselər kitabının müəllifidir.