Bizim yazarlarımız uğurlu marketinq işini bacarmırlar. Əlbəttə, yazıçının işi oturub əsərini yazmaqdır, çap qayğısı, yayım, marketinq işləriylə onun ədəbi agenti və yaxud əsərini nəşr etdiyi nəşriyyatlar məşğul olmalıdır. Azərbaycanda kitab sənayesi hələ tam formalaşmadığı üçün bu işlərlə də yazıçı özü məşğul olmaq zorundadır. Kitabın üzərindən ƏDV-nin götürülməsiylə bağlı dəfələrlə yazılar yazmış, təkliflərimizi səsləndirmişdik. Nəhayət, dövlət bu məsələyə reaksiya verdi və kitabla bağlı bu əngəl də aradan qaldırılır. Bu, çox böyük hadisədir. Kitab sənayesinin inkişafına təkan verəcək, kitablar oxucuya əlçatan olacaq. Olduqca vacib əsərlərin, elmi-fəlsəfi ədəbiyyatın dilimizə tərcüməsi sürətlənəcək. Sözümün canı nədir? Yazıçı yazdığı əsərin oxucuya çatması üçün də çalışmalıdır. İnanın ki, qısa bir zamanda bunun nəticəsini görəcək. Sumqayıt Kitab Sərgisində anşlaq yaşandı, minlərlə insan Sərgiyə üz tutdu. İnsanlar kitaba qayıdır.  Cəmiyyətdə bir kitab aclığı var. Artıq hər kəs anlamağa başlayır ki, kitabsız insan natamam qalır, kitabsız toplum içindəki qaranlıqdan, mənəvi yoxsulluqdan heç zaman xilas ola bilməyəcək. Kitab oxumadan bu dövlətə, bu xalqa heç bir fayda verə bilməyəcək. Milləti millət edən onun məfkurəsidir. Kitab məfkurə qaynağıdır. Məhz kitab vasitəsilə insan özünü yenidən yarada bilər. Başqa cür mümkün deyil. Özümdən nümunə götürürəm. Məni kitablar xilas edib. Dəfələrlə bu barədə yazılarımda yazmışam. Evimizdəki kitabxana olmasaydı, mən bəlkə də indi həyatda olmazdım. Məni həyatın girdabından kitablar dartıb çıxartdı. Kitabın gücünə, sehrinə inanan adamam. Əks halda bir cümlə də yaza bilməzdim.

Sumqayıt Kitab Sərgisində 2 saatın içində 200-dən çox kitabım satıldı. Təbliğat və piar düzgün qurulanda yazıçıya uğur gətirir.

Gününüzün müəyyən bir hissəsini mütləq kitaba ayırın. İnanın ki, bunun faydasını mütləq görəcəksiniz. Həyatınız daha da rəngadəng olacaq, mənəvi dünyanız zənginləşəcək, düşüncələriniz dəyişəcək, söz bazanız artacaq,  fikrinizi daha rahat ifadə edə biləcəksiniz. Daha güclü və yenilməz olacaqsınız, xarakteriniz formalaşacaq.

Mütaliənin zövqünü yaşamaq fövqəladə bir hisdir.