Azərbaycan aşıq sənətinin görkəmli simalarından olan Aşıq Ələsgərin seçmə şeirlərindən ibarət kitab Türkiyədə nəşr olunacaq.

Bu barədə verən Azərbaycan Aşıqalr Birliyinin katibi, Əməkdar mədəniyyət işçisi Musa Nəbioğlu bildirib ki, ustad sənətkarın anadan olmasının 200 illik yubileyi münasibəti ilə TÜRKSOY tərəfindən nəşrə hazırlanan kitabda yer alacaq şeirləri Türkiyə türkcəsinə şair Kənan Çarboğa uyğunlaşdırıb. Azərbaycan Aşıqlar Birliyinin sədri, Əməkdar elm xadimi, professor Məhərrəm Qasımlı isə kitaba Aşıq Ələsgər yaradıcılığına ayna tutan geniş ön söz yazıb.

Xatırladaq ki, Aşıq Ələsgərin zəngin poetik irsi XX əsrin otuzuncu illərindən başlayaraq Bakıda dönə-dönə nəşr olunmuş, ustadın otuza yaxın kitabı çap edilmişdir. TÜRKSOY xətti ilə işıq üzü görən seçmə Ələsgər şeirləri də onun poeziyasının Türk dünyasında, o cümlədən də Türkiyədə geniş tanıdılmasında mühüm rol oynayacaq. /Azərtac/