Azərbaycan İlahiyyat İnstitutunun (Aİİ) rektoru, ilahiyyat üzrə fəlsəfə doktoru Aqil Şirinov və Dinşünaslıq kafedrasının müdiri, fəlsəfə üzrə fəlsəfə doktoru, dosent Anar Qafarlının həmmüəllifi olduqları “İslam fəlsəfəsi (orta əsrlər – müasir dövr)” kitabı nəşr olunub.

Bu barədə institutdan məlumat verilib. Bildirilib ki, on fəsildən ibarət olan kitab İslam fəlsəfəsinin əsas nümayəndələri və problemləri oxucuya təqdim olunur. Həmçinin nəşrdə İslam fəlsəfəsinin mahiyyəti, onun İslam mədəniyyəti və düşüncəsindəki yeri, əhəmiyyəti və bu fəlsəfənin əsasını təşkil edən təməl mənbələr haqqında mühüm məlumatlar əldə etmək mümkündür. Kitabın elmi redaktoru AMEA-nın müxbir üzvü, fəlsəfə elmləri doktoru Könül Bünyadzadə, elmi rəyçiləri – AMEA Fəlsəfə və Sosiologiya İnstitutunun direktoru, professor İlham Məmmədzadə və fəlsəfə üzrə fəlsəfə doktoru, dosent Zeynəddin Şabanovdur.

Xatırladaq ki, Azərbaycan İlahiyyat İnstitutu kitab və dərsliklərin nəşri ilə bağlı bir sıra layihələr həyata keçirir. “İlahiyyat nəşrləri” adı altında layihəyə institut müəllimlərinin və bu sahədə çalışan mütəxəssislərin kitablarının nəşri daxildir. Eyni zamanda, ali təhsil müəssisəsinin qarşısına qoyduğu məqsədlərdən biri də ilahiyyat sahəsindəki problemləri araşdırmaq, beynəlxalq standartlara cavab verən tədqiqatlar aparmaq və onları nəşr etdirməkdir. /Azərtac/