Tanınmış yazıçı, kinodramaturq, Yazıçılar İttifaqının və Kinematoqrafçılar İttifaqının üzvü, “Şöhrət” ordenli Xalq yazıçısı Natiq Rəsulzadə ilə “Azərkitab”da görüş keçirilib.

AZƏRTAC xəbər verir ki, “Azərkitab”ın layihə rəhbəri Sabir Həsənov gecədə Natiq Rəsulzadənin yaradıcılığı haqqında danışıb. O bildirib ki, Natiq Rəsulzadə Azərbaycan Respublikası Prezidentinin fərdi təqaüdünə layiq görülüb, 15-dək filmin ssenari müəllifidir. Onun Azərbaycanda, ABŞ-da, Rusiyada, Macarıstanda, Polşada və başqa ölkələrdə 40-dan çox kitabı işıq üzü görüb.

Natiq Rəsulzadə çıxışında deyib: “Hər bir yazıçının ədəbiyyata aparan məxsusi yolu var. Mən birdən-birə yaradıcılığa atılmadım. Hələ məktəb illərində “Azərbaycan gəncləri” qəzetində yazmağa başladım, ilk ciddi tapşırığım isə “Qırmızı qərənfil” inqilab veteranları klubu haqqında reportaj hazırlamaq olub. Həmin vaxt on yeddi yaşlı gənc veteranlarla görüşü poetik çalarlarla qələmə almışdı. Bu qəzet mənə ən başlıca keyfiyyəti – artıq sözçülüyə varmamağı öyrətdi.

Sonra dördüncü kursda tərk etdiyim Azərbaycan Politexnik İnstitutu və Moskvadakı A.M.Qorki adına Ədəbiyyat İnstitutunda təhsil aldığım illər gəldi. Mənim kitablarımda bütün həyatım, tərcümeyi-halım, taleyim əks olunub”.

Azərbaycan Yazıçılar İttifaqının katibi, Xalq yazıçısı Çingiz Abdullayev qeyd edib ki, Natiq Rəsulzadənin yaradıcılığı müasir Azərbaycan nəsrində əsl hadisəyə çevrilib. Onun ədəbiyyatda Bakının həyatını məişət prizmasından təsvir edən özünəməxsus mövqeyi var.

Daha sonra tədbir iştirakçıları, ziyalılar yazıçının yaradıcılığından söz açıb, onunla bağlı xatirələrini söyləyiblər.