Strasburq bələdiyyə kitabxanası və mediatekasında “Azərbaycan ədəbiyyatı” bölməsi fəaliyyət göstərəcək.

Bu haqda Kəpəz nəşriyyatının rəhbəri Nicat Kazımov bildirib.

O qeyd edib ki, nəşriyyatın apardığı danışıqlar əsasında kitabxanada “Azərbaycan ədəbiyyatı” bölməsi yaradılıb və ədəbiyyatımızın fransız dilinə tərcümə edilmiş nümunələri yerləşdirilib. Artıq fransız oxucuları Azərbaycan ədəbiyyatının inciləri, tanınmış mütəfəkkirlərin, yazıçıların tərcümə edilmiş əsərləri ilə tanış olacaq və onları əldə edib evdə oxuya biləcəklər.

Azərbaycan ədəbiyyat nümunələrinin bələdiyyə kitabxana və mediatekasında yerləşdirilməsi, onların Fransanın bütün kitabxanalarının bazasında olacaq və dövlət kitabxanaları bu kitablarla bağlı sifarişlər edəcək. Bu təkcə ədəbiyyatımızın deyil, eyni zamanda, ölkəmizin reallıqlarının fransız cəmiyyətində tanıdılmasına böyük töhfə verəcək.

Artıq Nəriman Nərimanov və Hüseyn Abbaszadənin Kəpəz nəşriyyatı tərəfindən tərcümə olunmuş və nəşr edilmiş əsərləri kitabxananın “Azərbaycan ədəbiyyatı” bölməsinə, Əhməd bəy Ağayevin kitabı isə “Monde et Societe” bölməsinə yerləşdirilib. /Azərtac/