Azərbaycan Bəstəkarlar İttifaqında (ABİ) sənətşünaslıq üzrə fəlsəfə doktoru, Üzeyir Hacıbəyli adına Bakı Musiqi Akademiyasının (BMA) professoru Nailə Mehdiyevanın “Qara Qarayevin kino musiqisi” adlı kitabının (rus dilində) təqdimatı keçirilib.

Dahi bəstəkarın 100 illik yubileyi münasibətilə hazırlanan kitab “Şərq-Qərb” nəşriyyatında işıq üzü görüb.

Tədbiri Bəstəkarlar İttifaqının sədri, Xalq artisti, professor Firəngiz Əlizadə açaraq görkəmli bəstəkar Qara Qarayevin yaradıcılığından, onun dünya musiqisinə bəxş etdiyi töhfələrdən danışıb. Bildirib ki, yaradıcılığı zəngin milli köklərə bağlı olan dahi sənətkar Azərbaycan musiqisinin yen mərhələlərdə inkişafını təmin edib. Muğamlarımızı, aşıq sənətimizi də dərindən öyrənib. Bu haqda sanballı düşündürücü məqalələr yazıb. “Biz Qara Qarayevin tələbələri olaraq onun qoyduğu şərəfli missiyanı davam etdirməyə çalışırıq”, - deyə Firəngiz xanım vurğulayıb.

Prezident İlham Əliyevin Qara Qarayevin 100 illiyi ilə bağlı sərəncamını yada salan ittifaqın sədri böyük musiqiçinin yubileyinin silsilə tədbirlərlə qeyd edildiyini, Bakıda bəstəkarın ev-muzeyinin açıldığını diqqətə çatdırıb.

Bildirilib ki, dünya şöhrətli bəstəkarın əsərlərinin sorağı keçmiş SSRİ-nin hüdudlarını aşaraq ABŞ, Polşa, Misir, İspaniya, İtaliya, Fransa, Yaponiya və Almaniyada keçirilən möhtəşəm musiqi tədbirlərində səsləndirilib. Onun Nizami Gəncəvinin “Yeddi gözəl” poemasından bəhrələnərək yaratdığı “Yeddi gözəl” və Cənubi Afrika yazıçısı Piter Abrahamsın romanı əsasında yazdığı “İldırımlı yollarla” baletləri dünyanın bir sıra ölkələrində uğurla təqdim olunur.

Bəstəkarlar İttifaqının katibi, Əməkdar incəsənət xadimi, professor Cəlal Abbasov çıxışında görkəmli bəstəkarla bağlı xatirələrini bölüşüb: “Qara Qarayevlə ilk görüşüm Moskva şəhərində, Bəstəkarlar evində olub. O, mənə dedi ki, gətir görüm hansı əsərləri yazmısan. Skripka və fortepiano üçün yazdığım sonatanı təqdim etdim. Diqqətlə qulaq asdı və dedi: “Sən birinci öz-özünə deməlisən mən bəstəkar olmalıyam və olacağam. Bir də bəstəkar milliliyə çox fikir verməlidir. Yəni hər bir bəstəkar milli musiqinin dərin qatlarına nüfuz etməli, oradan bəhrələnməlidir. İnsan dağda-daşda yaşayırsa, daşdan, meşədə yaşayırsa, ağacdan ev tikir...”.

Tədbirdə daha sonra ABİ-nin katibi Aliyə Məmmədova “Qara Qarayevin həyat və yaradıcılıq paralelləri”,  musiqişünas, sənətşünaslıq üzrə fəlsəfə doktoru Natalya Dadaşova “Nailə Mehdiyevanın “Qara Qarayevin kino musiqisi” kitabı haqqında”, musiqişünas, sənətşünaslıq elmləri doktoru, professor Cəmilə Həsənova “Nailə Mehdiyevanın elmi-pedaqoji fəaliyyəti”, bəstəkar, BMA-nın doktorantı İlahə İsrafilova “Qara Qarayev bugünkü gənclərin təəssüratında” mövzularında məruzə ediblər.

Çıxışlardan sonra BMA-nın I kurs tələbəsi Səbinə Eldarlı, G.Şaroyev adına 35 saylı 11 illik Musiqi məktəbinin XI sinif şagirdi Səmra Həsənlinin ifasında Qara Qarayevin əsərləri səsləndirilib.