“Akademkitab” kitab evində Türkiyənin tanınmış yazıçısı Ahmed Hamdi Tanpınara həsr olunmuş tədbir keçirilib.

“Tanpınar günü” adı altında təşkil olunan tədbirdə tanınmış ziyalılar, kitab həvəskarları və mediya nümayəndələri iştirak ediblər.

Yunus Əmrə İnstitutunun müdiri İbrahim Yıldırım bildirib ki, Tanpınar türk ədəbiyyatının ən böyük yazarlarından biridir: "Əsərləri 36 dilə çevrilib. 4 əsəri Azərbaycan türkcəsinə çevrilib. Biz də Azərbaycanda yazarımızı tanıtmaq üçün esse yazı müsabiqəsi təşkil etmişik".

Digər natiqlər də Tanpınarın əsərlərindən misallar gətirib, onun ensiklopedik biliklərə sahib olduğunu vurğulayıblar.

Tədbirdə Tanpınar haqda geniş ədəbi söhbət və fikir mübadiləsi aparılıb, həmçinin onun yaradıcılığı haqda institut tərəfindən elan olunmuş “Tanpınarı kəşf edirəm” adlı esse müsabiqəsi haqqında məlumat verilib.

Tədbirin sonunda iştirakçılara Tanpınarın Azərbaycan dilinə tərcümə olunmuş kitabları paylanıb. /report.az/