Biri həyatı boyunca həmişə hüquq oxumaq istəyir. Vəkil olmasını təmin edəcək hər şeyi etməyə razıymış. Və çəkinmədən, gedib, HÜQUQun qapısında gözləməyə başlayır. Olduqca heybətli, böyük qapının qarşısında, içəri alınacağı günün, vəkil ola biləcəyi anın xəyallarını quraraq həyəcanla gözləməyə başlayır.

 

         Aradan illər keçir, amma qapı heç açılmır ki, açılmır. Lakin qəhramanımız əzmindən heç bir şey itirmədən səbirlə gözləyir. Nədənsə, nə qapı onun üzünə açılır, nə də vəkil olmaq üçün müraciət edən başqa birisi gəlir. İllər durmadan keçir. Qəhramanımız yaşlanıb ölümə yaxınlaşdığı vaxt yaşlı bir adam qapıya tərəf gəlir. Yazıq qəhramamınız o qədər utancaq olur ki, əvvəlcə qapının hansı səbəbdən üzünə heç açılmadığını soruşa bilmir. Lakin marağı utancaqlığına qalib gələn qəhramanımız çətin də olsa - "Mən uzun Illərdir ki, vəkil olmaq üçün bu qapıda gözləyirəm, hüquq bu qədər məşhur ikən, bu illər ərzində heç gəlib müraciət edən olmadı, niyə heç kim vəkil olmaq istəmir? - deyə, çəkinə - çəkinə onu narahat edən sualı verməyə macal tapır.

 

          Yaşlı adam gülümsəyərək, " Əslində sənə maraqlı olan məsələni bilirəm. Hamıya ömrü boyu bizdən istədikləri qapıları biz birdən çox hazırlayırıq. O qapıları da əsla bağlı saxlamarıq. Sən bu illər boyu qapının qarşısında gözlədin, bizə yalvardın, dua etdin, nə qədər istəkli olduğunu göstərmək üçün müxtəlif yolları sınaqdan keçirdin. Amma bir dəfə olsun qapını açmağa cəhd etmədin. Əgər qapının görkəmindən heyrətlənib qorxmasaydın, bu qədər böyük bir qapının bir barmaq, bir çırtma ilə belə asanca açıla biləcəyini görərdin. Biz sizə həqiqətən istədiyiniz hər qapını hazırlayarıq, amma açıb açmamaq tamamilə sizin öhdənizə buraxılmışdır.

 

          Niyə heç kimin gəlmədiyini də maraqlıdırsa, hər qapı yalnız bir adam üçün həyata hazırlanır. Bu qapı da yalnız sənin üçün hazırlanıb və indi mən səni də özümlə götürüb qapını sonsuza qədər açılmayacaq şəkildə bağlayıram. Gəl, getmək vaxtıdır!" - deyir

Tərcümə : İlkin Tomar

edebiyyat.biz