Azərbaycanın görkəmli ədibi, filosof, ədəbi tənqidçi, rəssam, publisist, böyük maarifçi-pedaqoq Əli bəy Hüseynzadənin İstanbuldakı arxivi Bakıya gətiriləcək.

Ə.Hüseynzadənin yeganə varisi olan qızı, 95 yaşlı Feyzavər Alpsarlan atasının əsərləri və şəxsi əşyalarından ibarət arxivini Azərbaycana bağışlayıb.

Arxivin bağışlanması Azərbaycanın Mədəniyyət və Turizm Nazirliyinin nümayəndə heyətinin, F.Alpsarlanın, həkimin, Azərbaycanın İstanbuldakı baş konsulluğunun nümayəndələrinin və notarius əməkdaşlarının şahidliyi ilə rəsmiləşdirilib.

Hazırda əsərlər Azərbaycanın İstanbuldakı baş konsulluğunun binasındadır. Onların Bakıya gətirilməsi üçün Türkiyənin Mədəniyyət və Turizim Nazirliyinə rəsmi şəkildə müraciət edilib və icazə verildikdən sonra Azərbaycana göndəriləcək. Əli bəy Hüseynzadənin arxivində çoxsaylı rəsm əsərləri, Türkiyə dövlətinin qurucusu Mustafa Kamal Atatürkün və həyat yoldaşının da yer aldığı tablo var. Bununla yanaşı, onun şəxsi əşyaları, iş masası, stulu, eynəyi, köhnə Osmanlı pulları, gümüş qaşıqlar, düymələr, döş nişanları, möhürü, saatı, üzüyü, medalları və s. mövcuddur. Əsərlər Bakıda rəsm və heykəltaraşlıq əsərləri, xəritələr, şəkillər, kitablar, pul əskinazları və başqa eksponatların nümayiş edildiyi “İstiqlal” muzeyində sərgiyə çıxarılacaq.

Qeyd edək ki, 2014-cü il yanvarın 21-də Azərbaycan Prezidenti İlham Əliyev Əli bəy Hüseynzadənin 150 illik yubileyinin keçirilməsi haqqında sərəncam imzalayıb və bununla bağlı Bakıda, İstanbulda və Türkiyənin müxtəlif şəhərlərində çoxsaylı tədbirlər keçirilib.

Xatırladaq  ki, Əli bəy Hüseynzadə 1864-cü ildə Salyanda anadan olub. O, XX əsr Azərbaycan-türk ictimai fikrinin ən görkəmli nümayəndələrindən biri, "Türkləşmək, İslamlaşmaq, Avropalaşmaq (müasirləşmək)" triadasının yaradıcısı, Azərbaycan bayrağındakı rənglərin müəllifi, türk dünyasında milli özünüdərkin və milli istiqlal düşüncəsinin müəlliflərindən biridir. Əli bəy Hüseynzadə ömrünün 46 ilini İstanbulda yaşayıb. /Report/