Moskvada Xalq yazıçısı, Azərbaycan Yazıçılar Birliyinin (AYB) sədri Anarın rusca işıq üzü görmüş yeni ikicildliyinin və “Sizsiz” kitabının təqdimatı keçirilib.

Kitablar Rusiyanın aparıcı nəşriyyatları olan “Xudojestvennaə literatura” və “Vremə” tərəfindən çap edilib. Bu nəşrlərdə yazıçının məşhur və daha əvvəllər də Moskvada çap olunmuş əsərləri ilə yanaşı, yeni yaradıcılıq nümunələri də öz əksini tapıb.

İkicildlikdə Anarın “Ağ liman”, “Beşmərtəbəli evin altıncı mərtəbəsi”, “Ağ qoç, qara qoç” və digər romanları, eləcə də hekayələri, həmçinin bu yaxınlarda yazdığı “Göz muncuğu” povesti yer alıb.

“Sizsiz” kitabına isə ədibin eyniadlı romanı, məqalələri və məşhur “Gecə düşüncələri” daxil edilib.

“Ocaq” Cəmiyyətinin təşkil etdiyi mərasimə Azərbaycanın və Rusiyanın görkəmli ədəbi və ictimai xadimləri, nüfuzlu nəşrlərin rəhbərləri, söz biliciləri və Anar yaradıcılığını sevənlər bir çox insan qatılıb.

Məşhur rəssam Tahir Salahov, “Ocaq”ın sədri professor Tofiq Məlikli, “Drujba narodov” jurnalının baş redaktoru Aleksandr Ebonaidze, tanınmış tənqidçi Lüdmila Lavrova, Azərbaycanın Rusiyadakı səfirliyinin müşaviri Vüqar İmaməliyev və başqaları Anar şəxsiyyəti və yaradıcılığı barədə fikirlərini bölüşüblər.

Sonda Anar çıxış edərək, tədbirin təşkilatçılarına və iştirakçılarına minnətdarlığını bildirib, oxucular üçün kitablarını imzalayıb.