Oktyabrın 16, 17 və 18-i saat 19:00-da yeni yaranan müstəqil ADO Teatrının açılışı olacaq. Teatrdan verilən məlumata görə, açılış mərasimində teatrın ilk “STOP” tamaşasının premyerası olacaq.

“Biz danışmayacağıq, göstərəcəyik!” şüari ilə teatr qeyri adi tamaşası ilə mədəniyyətə yenilik gətirmək istəyir.

Tamaşanın müəllifi və rejissoru teatrın rəhbəri Elmin Bədəlovdur. Tamaşadakı rolları isə Nihad Qulamzadə, Elza Furtado, Rumiyə Ağayeva, Anar Əliyev və Aynur Zərrintac canlandıracaq. Tamaşanın rəssamı Leyla Quliyeva, xoreoqrafı Rumiya Ağayevadır.

Teatrın yaydığı məlumata görə, tamaşaçılar da hadisələrin iştirakçısına çevriləcək: “Biz qabaqcadan tamaşaçılarımızı xəbərdar edirik. ADO Teatrı Azərbaycanda belə bir fərqli janrda yaranmış ilk teatrdır və burada insanlar da hadisələrin içərisində olacaq. Bu baxımdan aktyorların sizinlə davranışlarından çəkinməməyi tövsiyyə edirik”.

Teatrın ünvanı: Dilarə Əliyeva 141, Əlaqə: 050 394 48 64, Rəsmi səhifə: fb.com/adoteatr

Qeyd edək ki, ADO Teatrı sentyabrın 1-də təsis edilib, oktyabrın 16-da isə açılışı olacaq. ADO Teatrı ölkədə ikinci müstəqil teatrdır, 3 ildir ki, fəaliyyət göstərən ODA Teatrına və dövlət teatrlarına alternativ olaraq yaradılıb. Bu səbəbdən teatrın adı ODA Teatrının adının əksi olaraq seçilib.