Son günlər Manera.az Rüstəm Kamaldan aldığı müsahibə ilə unudulmaz Sabiri bir daha gündəmə gətirib. Onun yazdığlarının hələdə öz aktuallığını qoruduğu üçün Sabirin həmişəyaşar şair olduğunu bir daha isbatlayıb. Rüstəm Kamal nə yazdığını bilən insandır. Kimsə onun nə yazdığını bilmirsə, günahı Rüstəm muəllimdə yox, özündə axtarsın. Konkret Sabir məsələsində müəllim problem, Sabir də yox, cəmiyyətin düzəlməməsində, əksinə, mən daha deyərdim pisləşməsində görür. Sabir “fəhlə səndə özünü bir insanmı sanırsan” deyirdi, amma fəhləyə insan kimi baxmayanlar artıq bu gün millətin ziyalısına dil uzadırlar. Sabir sağ olsaydı yazardı: “Ziyalı sən də özünü bir insanmı sanırsan?  Xalqın dərdini deməyi asanmı sanırsan?”  Yenə  məmmədhəsənlər boy-boya verib, yenə ittihamın üçü bir qəpikdir…

Allah, bizim canımız nə zaman qurtulacaq bu ittiham, şivənlərin əlindən? Ay Məmmədhəsən, ay bala, Rüstəm Kamalın yeganə səhvi odur ki, o Sabirin dəyişə bilmədiyi sənin Məmmədhəsən kafanı dəyişdirmək istəyir. İstəyir ki,  sən biləsən, sən düzəlməyənə qədər Sabirin şeirlərinin aktual olması bu millətin irəli yox, geri getməsindən xəbər verir. Niyə düzəlmək istəmirsən, ay Məmmədhəsən kimilər dəstəsi? Nədir istəyiniz ? Niyə oxumursan ? Kafkanın adını  əzbərləyib Borxesden 2-3 sitat gətirməklə hara getmək istəyirsən? Məhəmməd Hadi zamanında belə yazırdı: “Oxumaqçün nə qədər dadü-fəqan etdimsə, Olmadı zərrə əsərbəxş bu istimdadım. Dağa dersən eşidir, sonra verir əks-səda, Daşa dönmüşlərə əks eyləmədi fəryadım”  İndi bəlkə silkələnmə, özünə qayıtmaq zamanıdır? Demirəm ki, oxu xarici yazarları. Oxuma, amma ilk öncə özünü oxu oxu, gör nə gündəsən. Sonra “yox imzası millətimin imzalar içində” deyib sonunda müalicə almaq üçün hətta öz şeirlərin satıb dərman, çörəkpulu əldə edən Hadi başda olmaqla öz yazarlarını oxu. Yoxsa düzəlməyəcəksən MƏMMƏDHƏSƏN! Lap elə sonunda “Yeddi oğul istərəm” filmində deyildiyi kimi deyəcəklər: Qəqənisən ki qəqəni!

 Çalış bu söz sənə deyilməsin: “Məmmədhəsənsən ki Məmmədhəsən…”

Avanqard.net