Qulu Ağsəs: "Tanrı Göyləri yaratdı və dincəldi...
Tanrı Yerləri yaratdı və dincəldi...
Tanrı Kişini yaratdı və dincəldi...
Tanrı Qadını yaratdı və ...
O gündən nə Kişi, nə Yerlər, nə Göylər, nə də Tanrı dinclik tapır...
Yaradılanın ən mükəmməli - bayramın mübarək!!!"

Azad Qaradərəli: "Əslində ayrıca QADINLAR BAYRAMI düz deyil. Bu bayramı onlar bizsiz necə keçirə bilərlər? Biz ki, ONLARIN oğlu, qardaşı, atası və ən ümdəsi həyat yoldaşıyıq? Demək, bu bayram QADINLARA KİŞİLƏRİN BAŞ ƏYDİYİ GÜNDÜR, Axı cənnət də onların ayaqları altdadır.(Vallah elə cəhənnəm də! Onlar istəsələr bircə anda bizim həyatımızı cəhənnəmə döndərərlər.) Bir sözlə, bu gün hamının bayramıdır! Əziz QADINLAR! Hamılıqla bayramınız mübarək! Həyatımızı cənnətə çevirməkdə davam edin, lütfən!"

Firuz Mustafa: "Bütün qadınları 8 Mart bayramı münasibətilə təbrik edirəm. Bu da Bayram hədiyyəsi:

Sevin qadınları, ürəkdən sevin!
Anadır, bacıdır, yardır qadınlar.
Büllur sütunudur onlar hər evin,
Sərvətdir, dövlətdir, vardır qadınlar.

Sevin qadınları, sevin ürəkdən!
Qadınlar zərifdir güldən, çiçəkdən.

Sevinci bahardır, kədəri qışdır,
Qadın haqqı təndir Tanrı haqqına.
Qadınlar ilahi heykəltəraşdı,
Ruh verir, can verir yaratdığına."

Vüsal Nuru: "Ey azad qadın, azadlığın mübarək!"

Salam Sarvan: "İki dəfə olub ki, küçədə gəzəndə ürəyimin möhkəm sıxıldığını hiss eləmişəm. Biri Təbrizdə, biri də 5-6 ay qabaq rayonların birində. Sonradan bunun səbəbini anlamışdım. Təbrizdə bütün qadınlar çadralıydı - şəhər qadınsız görünürdü. Rayonların birində isə küçələrdə bircə nəfər də qadın gözə dəymirdi.
Bayramınız mübarək, xanımlar!"

Cəlil Cavanşir: "Bir dostum tez-tez deyir ki, "Qadınla da olmur, qadınsız da, biz onlara məhkumuq".
Düşünürəm, həqiqətən qadınsız bir dünya çox çətin olardı. Bütün əzabkeş, zəhmətə qatlaşan, məhrumiyyətlərə dözən, mübarizələrdə öndə gedən qadınlarımızın bayramını təbrik edirəm!
Küçədə asfaltın üzərində oturub dilənən, günahsız yerə şərlənib həbsxanada günlərini sayan, uzaq dağ kəndində odun kəsən, şəhərin məhrumiyyətli həyatında gecə-gündüz yoxluqlarla savaşan bütün qadınlar qiymətli, əziz və gözəldir!
Hər şeyə rəğmən qadın sevilməyə, əzizlənməyə və diqqətə layiqdir...
Dəyərli qadın dostlarım, oxucularım, əzizlərim! Hamınız qiymətlisiniz, özəlsiniz və dünyanın ən gözəl təbriklərinə layiqsiniz! Xoş günlər hər zaman sizin olsun!"

Rüstəm Behrudi: "Tanrım, bu bayram günündə gör ağlıma nə gəldi-mənə elə gəldi ki, göydən gələn nə varsa, hamısı mənə tanışdı və məni heyrətləndirəcək heç nə qalmayıb. Bu məni çox qorxutdu.

Ey Tanrım, poz yazdığın yazını bircə kərə,
Bəndəlikdən çıxarıb özgə tale yaz, Allah!
Dərvişlik istəmirəm, dərvişə xirqə gərək,
Çılpaq ruhum əbaya, xirqəyə sığmaz, Allah!

Ağac ildə bir kərə, mən hər gün puçup-puçur,
Dərd açıb, düzdüm onu tənhaların baxtına...
Öldür,kimə üz tutsam, nəyə sığınsam, uçur,
Ucalt məni ömürlük divanələr taxtına.

Bu taxtımda mən sənəm, qəbul et, etmə məni,
Ucalt məni bu taxta, sonradan istəsən yıx;
Mən səni çağırıram, ey Tanrım, səni, səni...
Mənim də bəndəmi gör-sonsuzluqda tənhalıq...

Bütün qadınları analıq mərtəbəsinə qaldır ,Tanrım!
Bayramınız qutlu olsun, analar!"

Kənan Hacı: "Bütün qadın yazıçılarımızı ürəkdən təbrik edirəm!"

Fərid Hüseyn: "8 marta Vaqif Səmədoğlunun ayrı-ayrı illərdə Nüşabə xanıma yazdığı beş şeiri oxumaqla başladım. Xanımlara sevilmək xoşbəxtliyi arzulayıram."

Mirmehdi Ağhaoğhlu: "Nə yalan deyim, tinim düz. Gecədən keçmiş gəlmişəm evə. Gördüm ki, yoldaşım 85 yaşlı, artıq nə yediyini, nə dediyini bilməyən nənəmin çarpayısı başında oturub onunla şirin-şirin danışır. Məqsədi qarının başını qatmaqdır: Toyun yadına gəlir? Necə olmuşdu? Kimlər gəlmişdi...
Kandarda dayanıb xeyli baxdım bu mənzərəyə- 11 uşaq doğub böyütmüş nənəmə və nəzakətlə onun qaydına qalan gəlinimizə.
Bax, budur mənim üçün Azərbaycan qadını. Sənin qabağında diz çöküb və əgər mümkünsə başımı dizlərinə qoyub ağlamayım nə edim, QADIN!
Bayramın mübarək olsun, qadın!""

Elnur Astanbəyli:

"Erkek:
- Tanrım, kadınları niye bu kadar güzel yarattın?
Tanrı:
- Aşık olasınız diye...
- Peki niye bazen aptal oluyorlar?
- Onlar da size aşık olabilsinler diye...

Xanımlar, bayramınız mübarək!"

Səxavət Sahil: "Dəyərini bilən qadın gözəldir. Bayramınız mübarək!!!"

Qeyd edək ki, 8 mart ənənəsinə görə qadınlar əks cinsin nümayəndələrindən diqqət, gül və hədiyyə gözləyirlər. 8 mart postsovet respublikalarında, habelə Anqola, Burkina-Faso, Qvineya-Bisau, Kamboca, Çin, Konqo, Laos, Makedoniya Respublikası, Monqolustan, Nepal, Şimali Koreya və Uqandada qeyri-iş günü sayılır.