2008-ci ildə dövlətdən Azərbaycan Yazıçılar Birliyinin (AYB) üzvlərinin mənzil ehtiyacını təmin etmək üçün ayrılan ərazidə tikinti işləri hələ ki gecikir. Bakı şəhəri, Xətai rayonunda ayrılan yerdə tikinti işlərinin gecikmə səbəbləri də məlum deyil.

AYB sədrinin müşaviri, mənzil komissiyasınnı sədri Rauf Aslanov açıqlamasında tikinti işlərinə nəzarətin komissiyanın səlahiyətində olmadığını bildirib. Qeyd edib ki, komissiyanın səlahiyyəti yalnız bölgü prosesində iştirak edib, hazır mənzillərin üzvlər arasında obyektiv bölüşdürülməsinə nəzarət etməkdir:
“Dövlət tərəfdən, bizə 2008-ci ildə torpaq sahəsi ayrılsa da, hansısa problemlərlə əlaqədar bu iş uzandı. Sonra məsələ öz dəqiq həllini tapdı. Bakı şəhər İcra Hakimiyyətinin 13 mart 2014-cü il tarixli məktubunda bildirilir ki, AYB üçün inşa ediləcək kooperativ evin tikinti işinə birlikdə layihə verib yeri dəqiqləşdirəndən sonra başlanıla bilər. Məsələ burasındadır ki, Azərbaycan Yazıçılar Birliyinə ayrılan Xətai rayonu, G.Şıxlinski küçəsində 2942 V saylı məhəllədəki ərazi iki nəfər tərəfindən qanunsuz özəlləşdirildiyi üçün məsələ məhkəmə yolu ilə həll edilib və Bakı şəhər İcra Hakimiyyəti hazırda inşaat işlərinin başlanması üçün maneə olmadığını qeyd edir. Məsələnin ilk mərhələsi bundan ibarətdir”.

Rauf Aslanov qeyd edir ki, tikintiyə nəzarət etmək onun səlahiyyəti daxilində deyil. Müşavir bu işin mənzil komissiyasına aid olmadığını, 7 nəfərdən ibarət komissiyanın tikintiyə nəzarət yox, mənzil bölgüsü üçün təşkil edildiyini bildirib:

“Mənə aid olmayan işlərə müdaxilə etmirəm. Rəhbərlik də bu işi mənə tapşırmayıb. Binanın tikintisi və buna nəzarət mənim səlahiyyətimdə deyil. Açığını deyim ki, bu iş üzrə mütəxəssis də deyiləm. Yəqin ki, Anar müəllimin bu işi tapşırdığı kimsə var. Mən hətta o yeri də görməmişəm. Bizim işimiz konkret olaraq bölgü ilə bağlıdır. Onu da 9 mənzil məsələsində siz özünüz də görmüsünüz. Biz həmin bölgünü açıq şəkildə mətbuatda və saytlarda işıqlandırırıq. Biz açıq-aşkar yazdıq ki, növbədə 49 nəfər var, 9 mənzil isə 36 nəfər arasında bölünəcək. Elə də oldu. AYB 36 üzvünə nə iləsə kömək etdi”.

Müşavir bina tikilərsə, mənzillərin necə bölüşdürüləcəyinə də münasibət bildirib:

“Bircə onu bilirəm ki, komissiyanın sədrinin kimliyindən asılı olmayaraq sonda bu məsələ mütləq mənzil komissiyasından keçəcək. Növbədə 14 nəfər var. Əgər bu məsələ müsbət sonluqla nəticələnsə, onda biz ilk olaraq 14 nəfəri nəzərə alacağıq. Amma yenə bunlar arasında da araşdırmalar aparılacaq. Çünki ola bilsin ki, onlardan hansısa biri sosial şəraitində müsbət irəliləyiş edib, ola bilsin ki, kimsə, ümumiyyətlə, birliyi tərk edib və s. Növbədə olan bu insanlardan sonra isə sosial şəraiti həqiqətən də yaxşı olmayan üzvlər nəzərə alınacaq. Əgər bölgülər aparılsa bu, mətbuatda, saytlarda açıq-aşkar işıqlandırılacaq”.

Qeyd edək ki, bir müddət öncə mediada yazılanlara görə tikintiyə nəzarət AYB sədrinin müavini Nazim İbrahimova həvalə olunub.

/Elmin NURİ, Modern.az/