Yazıçılar üçün nəzərdə tutulan yaşayış binasının tikintisi yubanır.

Prezident İlham Əliyevin göstərişi ilə 2008-ci ildə Bakı İcra Hakimiyyəti AYB üzvlərinə mənzil tikmək üçün Xətai rayonu Neapol dairəsi yaxınlığında yer ayırsa da, tikinti işləri naməlum səbəblərdən gecikir.

Əldə etdiyimiz məlumata görə, bir qrup mənzilə ehtiyacı olan yazıçı məsələ ilə bağlı dəfələrlə AYB rəhbərliyinə müraciət etsə də, məsələ həllini tapmayıb.

Birlik üzvlərinin verdiyi məlumatda bildirilir ki, sözügedən ərazidə tikiləcək binanın sənədlərinin hazırlanması AYB-nin sədr müavini Nazim İbrahimova həvalə olunub:

“Bu şəxs ili ilə satmaqla məşğuldur. Müraciətlərimizə bir dəfə doğru-düzgün cavab verilməyib. Prezident 5 il öncə sərəncam imzalayıb. Niyə bu əmr yerinə yetirilmir? Torpaq AYB-yə verilib və birlik üzvləri kooperativ ev tikilməsinə razı olduqları halda, niyə sədr müavini şirkət axtarışına çıxıb?”

AYB sədrinin müavini, Xalq şairi Fikrət Qoca da torpağın ayrılmasını təsdiq edərək bu işlə Nazim İbrahimovun məşğul olduğunu dedi. Şair söz verdi ki, yaxın günlərdə məsələ ilə bağlı şəxsən özü maraqlanacaq.

AYB-nin mənzil komissiyasının sədri Rauf Aslanov da binanın tikilməsi üçün torpağın ayrıldığını təsdiq etdi:

“Bu istiqamətdə işlər gedir. Fikrimiz var ki, orada kooperativ bina tikdirək. Bu işdə məsul olan şəxs Nazim İbrahimovdur. Məsələ ilə bağlı  detallı məlumat almaq üçün ona müraciət etmək lazımdır”.

Yetərincə ciddi olan problemin səbəblərini öyrənmək üçün Nazim İbrahimovla əlaqə saxladıq. Sədr müavini isə başının qarışıq olduğunu bildirərək suallarımıza ötəri cavab verdi:

“Bakı Şəhər İcra Hakimiyyəti (BŞİH) binanın tikintisi üçün ayrılan ərazinin sənədini verməyib. Bundan başqa, binanın kooperativ olaraq tikilməsi mümkün deyil. Hansısa MTK ilə danışıqlar aparılacaq və tikilən binadan 10 faiz məbləğində vəsait alacağıq. Hal-hazırda çox məşğulam. Vaxt tapan kimi bu işlə məşğul olacağam”.

Qurum rəsmisinin bu cavabı bizi çox təəccübləndirmədi. Çünki 5 il öncə verilən tapşırığın ləngiməsi, görünür, cənab İbrahimovu tələsdirmir.

Ayrılan torpağın meriya tərəfindən sənədinin verilməməsi məsələsinə gəlincə isə buna da aydınlıq gətirdik. BŞİH-nin adının çəkilməsini istəməyən işçisi bildirdi ki, torpaq ayrılıb və AYB-nin tam ixtiyarındadır. /kult.az/