2014-ci ilin bitməsinə iki həftədən də az vaxt qalıb. Bu il bir çoxları üçün düşərli, bəziləri üçün uğursuz oldu. Modern.az saytı yazarlar arasında sorğu keçirərək, 2014-cü ilin onlara nə qədər düşərli olduğunu öyrənməyə çalışıb:

Cavanşir Yusifli, ədəbiyyatşünas alim, tərcüməçi:

- Yola saldığımız 2014-cü ilin başa çatmağını indi sən yadıma saldın. Vallah, başım o qədər qarışıq olur ki, ilin necə keçdiyi adamın yadından çıxır, ancaq şübhəsiz ki, hər il yerinə yetirdiyin, gördüyün işlərin hesabatını özün-özünə verməli olursan. Bu mənada 2014-cü ildə heç bir kitab nəşr etmədim və buna çox sevinirəm. İndiki zamanda kitab çap etdirmək və dolayısı ilə zənn etmək ki, insanlar bunu oxuyacaqlar, şübhəli bir şeydir. Ona görə portallarda yazıların çapına üstünlük verdim. Lap son zamanlarda kult.az portalında Kəramət Böyükçöllə bir layihəni aparırıq, hər ikimiz üçün çox maraqlıdır və güman edirəm ki, məhz belə layihələr vasitəsi ilə ədəbi prosesə təsir eləmək olar. İndinin ədəbi prosesi dialoqu sevir, bu işimiz 2015-ci ildə də davam edəcək. Yəqin ki, gücümüz çatsa, başqa layihələr də olacaq. Sonra, 2014-cü ildə “Kitabçı” jurnalı məni xeyli sevindirdi. Bu jurnalda ürəyim istəyən 4-5 yazım dərc edildi. Ümumi şəkildə götürdükdə bizim üçün (təkcə mənim üçün deyil!) 2014 ədəbi ilini uğurlu adlandırmaq mümkündür. Bir sıra uğurlu əsərlərimiz oldu, onları müzakirə elədik (Mübariz Cəfərlinin 3 romanı), Anarın, Kamal Abdullanın yeni əsərləri, tələbələrimdən Mübariz Örənin, Səxavət Sahilin, Hədiyyə Şəfaqətin və digər yazarların əsərləri 2014-cü ilin uğur aktivinə yazıldı.

Nəriman Əbdürrəhmanlı, yazıçı-tərcüməçi:

“Mübaliğəsiz 2014-cü ili istər şəxsi planda, istərsə də yaradıcılıq sarıdan həyarımın ən uğurlu illərindən sayıram. Əvvəla, uzun illərdən sonra yenicə yaradılan  Azərbaycan Tərcümə Mərkəzində işləməyə başladım. Ötən ilin sonunda işıq üzü görmüş “Yolçu” romanın haqqında müsbət rəylər bildirildi. Üzərində 20 ildən bəri düşündüyüm arzum gerçəkləşdi, “Qurban” romanını birirdim və çap etdirdim. “Könül elçisi” romanın Türkiyə türkcəsinə çevrildi və İstanbulda, nüfuzlu “İz yayınçılıq” nəşriyyatında işıq üzü gördü. Beş tərcümə kitabım nəşr olundu, bir neçəsini də bitirib nəşriyyata təhvil verdim. Yayda Türkiyəyə, Rusiyaya, Belorusa səfərlərim məndən ötrü çox maraqlı oldu. Bütün bunlara görə 2014-cü ildən narazı qalmağa haqqım yoxdur”.

Elçin Mirzəbəyli, şair-jurnalist:

“Bu ili yaradıcılığımda uğurlu bir il hesab edirəm. Bu il “Sevgi məktubları” kitabım çapdan çıxıb, imza günü və təqdimatı keçirilib. Bir neçə şeirimə mahnı bəstələnib. Oxucularla görüşmək, təmasda olmaq, onların sevgisini hiss etmək imkanı yaranıb. Bundan daha yaddaqalan nə ola bilər ki?”.

Əkbər Qoşalı, şair:

“Dilqəm Əsgərov, Şahbaz Quliyev və Həsən Həsənovun öz doğma torpaqlarımızı ziyarətə gedərkən başlarına gələnlər, Həsənin həlak olmasının ardınca, digər iki soydaşımızın düşmən Ermənistan tərəfindən... yenə öz torpağımız olan Xankəndində qondarma məhkəməyə çıxarılması, onlara verilmiş işgəncələrin hər hallarından ekrana yansıması... 2014-cü ili yaddaşıma qara yazan bir hadisədir... Ancaq Dilqəm Əsgərov və Şahbaz Quliyevin azadlığa qovuşacaqlarına, nazilən - çox nazilən haqqın üzülməyəcəyinə ümidvaram... Ən böyük istəklərimdən biri elə 2014-cü il başa çatmadan onların azadlığa qovuşmasıdır. Əlbəttə, bütövlükdə, Qarabağımızın azadlığa qovuşmasını təmin edəcəyimiz il illərin ən gözəli olacaq inşallah! Bu ilin 8-ci ayında Macarıstana səfərim, orada, V Turan Qurultayında yaşadıqlarım bu ili həm də, müsbət emosiya ilə, necə deyərlər, gözəl xatırlamağıma səbəb olan hadisələrdən biridir, deyə bilərəm. Türk Dünyası gənc yazarlarının bir qrupu ilə gerçəkləşən II Bakı Toplantısında yaşadığımız gözəl anlar da unudlumazdır, əlbəttə... Gənəl olaraq, bu il sıralaması, gün sıralaması... özünüz bilirsiz, nisbi xarakter daşıyır, dünyanın heç də bütün ölkələrində il eyni vaxtda başa çatmır... yaxud, eyni illəri yaşamırıq... Doğrusunu, Tanrı özü bilir. Keşkə Tanrının sıralamasında günümüz, ayımız, ilimiz xoş olsun, gözəl görünsün”.

 Cəlil Cavanşir, şair-tərcüməçi:

“Mənim üçün 2014-cü il yaradıcılıq baxımından olduqca uğurlu illərdən biridir. Bu il ikinci romanımı tamamladım və çap etdirdim. “Qadın corabları”nın həm satışı, həm kitab haqqında eşitdiyim fikirlər mənim üçün böyük stimul oldu. Eyni zamanda Konan Doyldan tərcümə etdiyim 5 kitabdan ikisi çap olundu. Hazırda ili yola salmadan "p.s : darıxıram..." adlı şeirlər və esselər kitabımı nəşrə hazırlayıram. Eyni zamanda ürəyimcə olan bir-iki şeir, bir-iki yazı da yazmışam. 2014-cü ilin mənim üçün ən yaddaqalan detalı qızım Canselin doğulmasıdır. Onun gəlişi həyatımı tamamən fərqli istiqamətdə dəyişib. Yazmağa, yaşamağa daha ürəkdən bağlanmışam. Eyni zamanda bu il oğlum Ayhan birinci sinifə gedib. Hardan baxsam savaş dolu, mübarizə dolu bir il arxada qalır. İlin əvvəlində səhhətimdə ciddi problemlər yaranmışdı, hazırda hər şey yaxşıya doğrudur. 2014-cü il çox dolu, çox enerjili bir il olsa da, məni yormağı bacardı. Bütün uğurlarıyla, uğursuzluqlarıyla bir il də yazıldı həyatıma. Ümid edirəm 2015-ci il daha uğurlu və yaddaqalan olacaq”.

Alpay Azər, yazıçı:

“Bu il keçirilən III Mahmud Kaşğarlı müsabiqəsinin milli mərhələsində (Azərbaycan üzrə) 1-ci yeri tutdum, ümumtürk mərhələsində 3-cü yeri. Bir də, mənə elə gəlir, keçən il zəif yazdığım hekayələrlə müqayisədə bu il keyfiyyət göstəricimi bir qədər aldırmışam”.

Rüfət Əhmədzadə, yazıçı-tərcüməçi:

“İki müsabiqədə yüksək yer qazandım. Kulis.az-ın "Ən qısa hekayə" yarışmasında üçüncü, "Ədəbi Azadlıq" müsabiqəsində şeir nominasiyası üzrə birinci oldum. Kitabım çıxdı, oğlum oldu. Özümü nəsrdə və nəzmdə göstərə bildim. Üçüncü və dördüncü kitablarım da hazırdır. Bir kitabım nəşriyyatda qalıb, amma imkan yoxdur çapa, son məqamda təxirə salındı. Ədəbiyyata pauza verib jurnalistikaya qayıtdım. Beynəlxalq siyasət müxbiri kimi az müddətdə yaxşı nəticələr göstərdim, beynəlxalq tədbirlərdə iştirak edib təcrübə qazandım. Bir də Avropanın mötəbər ali məktəblərindən birinə müraciət etdim və sadəcə siyasi esse yazmaqla, imtahansız Siyasi Elmlər fakültəsinin magistratura şöbəsinə qəbul olundum. Amma ailəmi aparmaq məsələsi var deyə, növbəti tədris ilinin əvvəlinə qədər düşünüb yol axtaracağam. Belə... Yetərincə uğurlu oldu. Ölkənin qabaqcıl mediasında çalışmaq özü də uğurdur”.

Bəxtiyar Elcan, gənc yazar:

“Nə cür gəlmişdisə, o cür sakitcə də getdi. Qoymadı doyaq. Bir az İŞİD qanımızı qaraltdı, amma qısa zaman kəsiyində bu qaralığa vərdiş elədik. Ədəbiyyata gələk... Cəmi 3-4 kitab oxuya bildim. Özümü saxlaya bilmədim, yenə şeirə qayıtdım. Ümumi götürdükdə ədəbiyyat aləmində maraqlı heç nə olmadı. Tək sevinəcəyimiz bir şey oldu: Allah Aqşinlə bağlı dualarımızı eşitdi, əllərimizi ətəyindən kəsmədi. Şəxsi həyatıma gələndə isə... Çox sevdiyim nənəmi itirdim, yeni iş yeri qazandım. Yeni-yeni tanışlarla, xoş hadislərlə bol oldu günlərim. Amma yenə özümü saxlaya bilmədim. Demək olar ki, məni çox istəyən hər kəsin xətrinə dəydim. Çox dostlarımın, yaxınlarımın ümidlərini doğrulda bilmədim. Əlqərəz, bu il də yaxşı insan olmağı bacarmadım...”.

Kənan Hacı, şair:

“2014-cü il “Rəqqasə” adlı romanım nəşr olundu. Xeyli təzə yazılar yazmışam”.

Zəka Vilayətoğlu, yazıçı:

 “Ədəbiyyata aid maraqlı və uğurlu layihəmizi həyata keçirdik. Qarabağ müharibəsi mövzusunda Hekayə Müsabiqəsi təşkil etdik. Bu il həm də çoxsaylı yaxın və uzaq şəhərlərə-ökələrə maraqlı səfərlər yadda qaldı. “Sındırılmış mondalina” adlı yeni romanımı yazdım”.