Bakı Slavyan Universitetinin nəzdində fəaliyyət göstərən Yaradıcılıq Fakültəsinin yeni dinləyiciləri ilə görüş keçirilib.

Görüşdə fakültənin yeni dekanı Salam Sarvan yeni dinləyicilərə bu fakültənin fəaliyyəti ilə bağlı məlumat verib. Daha sonra Yaradıcılıq Fakültəsinin yaradıcısı, Azərbaycan Respublikasının Millətlərarası multikulturalizm və dini məsələlər üzrə Dövlət müşaviri Kamal Abdulla çıxış edib. O, Yaradıcılıq Fakültəsinin uğurlarından söz açıb: “Yaradıcılıq fakültəsinin sizdən əvvəlki tələbələrinin bir çoxu imza kimi özlərini təsdiqləyiblər. Baxıram, burada Daşkəsəndən, Masallıdan, başqa rayonlardan iştirak edənlər var. Deməli, Yaradıcılıq Fakültəsinin əhatə dairəsi bu qədər genişlənib. Artıq rayonlarımızda da bu Fakültənin fəaliyyətindən xəbərdardırlar”.

Kamal Abdulla dinləyicilərə Yaradıcılıq Fakültəsində hər cür şəraitin yaradılacağını bildirib: “Mən istərdim ki, buradakı gənclər müxtəlif layihələrlə çıxış etsinlər. Mən bu layihələrin gerçəkləşməsinə kömək edəcəyəm”.

Sonda Yaradıcılıq Fakültəsinin dekanı Salam Sarvan yeni dinləyicilərə “Dinləyici vəsiqəsi”ni təqdim edib. /kult.az/