Aqşin Yenisey bu gün saat 13.00-da Mərkəzi Gömrük hospitalına köçürülüb. Bu barədə Kulis.Az-a Aqşin Yenisey məlumat verib. Onun sözlərinə görə Gömrük Hospitalında müalicəsi dövlət hesabına aparılacaq.

*** 
"Qafqazinfo"nun məlumatına görə, Aqşin Yeniseyin səhhəti ölkə rəhbərliyinə məruzə olunub və bundan sonra müalicəsinə diqqətin daha çox ayrılması ilə bağlı göstəriş verilib. Bildirilir ki, şair hələlik Azərbaycanda ciddi həkim nəzarətinə götürülüb, ehtiyac yaranarsa, xaricdə müalicəsi davam etdiriləcək.

***
“İynə-dərmanlar öz sözünü deyir, səhhətim yavaş-yavaş düzəlir. Səhhətimdə ciddi irəliləyişin olduğunu hiss edirəm”.
 
Bu sözləri verdiyi açıqlamada hazırda xəstəxanada yatan şair Aqşin Yenisey bildirdi.
 
Onun sözlərinə görə, ciyərlərinə yığılan suyun çəkilməsi prosesi uğurla gedir: “Su quruyur artıq, bir şey qalmayıb”.
 
Dəstəyini əsirgəməyən bütün dostlara öz minnətdarlığını bildirən Aqşin Yenisey indi yanına heç kimin buraxılmadığını söylədi: “Həkimlər məəttəl qalıblar ki, bu avara kimdi axı, yanına bu qədər adam gəlir. Mənə baxan həkimlər isə deyir ki, çox narahat olmamalısan, yaxşı istirahət etməlisən, buna görə də çox adamın gəlməyi, burda bir neçə saat oturmağı doğru deyil. Hətta dostlarımızdan biri o günü burda kitab təqdimatı keçirirdi. Əlbəttə gələnlər məni çox istədiyinə, mənə görə narahat olduqlarına görə gəlirlər. Ancaq həkimlər mənim istirahətə ehtiyacım olduğunu nəzərə alaraq göstəriş veriblər ki, yanıma heç ki buraxılmasın”.