Yazıçı Seyran Səxavət “Qanun” nəşriyyatına gəlib və “Qanun” ətrafında baş verən hadisələrə münasibətini bildirib:

“Qanun” Nəşriyyatını ölkənin ən qabaqcıl nəşriyyatlarından biri hesab edirəm. Bu nəşriyyat xeyli qiymətli kitablar nəşr edir. Nəşriyyatın məhsulları məzmunu qədər estetik baxımdan da gözəldir. Bu da oxucuda maraq oyadır. “Qanun”un bir özəlliyi də odur ki, istedadlı, amma imkansız gəncləri önə çıxarmağa köməklik göstərir.

Nəşriyyatın 150 min manat cərimələnməsinə yazıçının münasibəti belə oldu:

“Qanun”un cərimələnməsinə təəccüblənmədim, amma çox qəzəblə qarşıladım. Nəşriyyatı cərimə etməzlər, nəşriyyata kömək edərlər. Azərbaycanda  cərimələnəsi, cəzalanası o qədər təşkilatlar var ki... Onların hamısı cərimələnəndən sonra – hansı ki, bu prosses 15-20 il çəkər, -  keçmək olar nəşriyyatlara. Biz kitaba and içirik, bundan müqəddəs nə var ki? Nəşriyyat dönər istehsal etmir, kitab istehsal edir. Dönər istehsal edənlə kitab istehsal edənə eyni gözlə baxdıqca ölkədə, cəmiyyətdə heç bir inkişafdan söz gedə bilməz. Düşünürəm ki, nəşriyyatın bu problemini elə Azərbaycansayağı həll etmək lazımdır. “Qanun” yaşamaq üçün lap qanunsuz da hərəkət edə bilər.

“Qanun” həm də mənə çox doğmadı.  Burda mənim üç kitabım (“Yəhudi əlifbası” “Qaçaqaç”, “Palıd toxumu”) nəşr olunub, bu kitablar da ömrümün 30 ili deməkdir. Mən indiyə qədər heç vaxt prezidentdənnəsə xahiş etməmişəm. Amma indi xahiş edirəm ki, “Qanun” Nəşriyyatına kömək etsin.

Avanqard.net