Qaz sayğacının balans kartı
havanın tempraturu kimi 0-a düşüb,
üşüməklə məşğulam.

Cibimdə yalnız dəmir pullar qalıb,
heyif ki, indi dəmir dövrü deyil.
Səhər  evdən çıxanda ilk eşitdiyim bu oldu:
-Dəmir alıram, kilosu 1 manata.
Əllərimi cibimə salmaq istədim.
Küçəmizi süpürən qadın da gözlərini cibimə dikdi -
hər dəfə onu görəndə utanıram.

Marketdəki kassada 3 manat 95 qəpik əvəzinə
məndən 4 manat alır uzun dırnaqlı qız.

İş yerimdə maaş artımı təkcə sözdən ibarətdir –
burda söz ağızdan çıxmır.

Edamını gözləyən İsa kimi olsam da,
ölüm şərabından imtina etmərəm –
heç olmasa acından ölməyim!

31.01.2014