“Dədə Qorqud” dastanı əsasında çoxseriyalı bədii televiziya filminin çəkilməsi haqqında təşəbbüs mənə məxsusdur. Ona görə, ssenari də mən yazacam”.
 
Bu sözləri APA-ya Azərbaycan Yazıçılar Birliyinin sədri, xalq yazıçısı Anar deyib. Onun sözlərinə görə, hazırda ssenarini yazmaq üçün materiallar toplayır: “Ssenarini yazmazdan əvvəl hazırlaşmaq, material toplamaq lazımdır. Hər halda yanvar-fevral aylarında ssenarini başa çatdıra biləcəyəm. Deyə bilərəm ki, dastanın boyları əsasında hər seriya bir film olacaq. Yəni demək istəyirəm, ilkin olaraq belə nəzərdə tutulub. Sərəncam bu gün verilib və Dədə Qorqud rolunda kimin oynayacağı ilə bağlı danışmaq tezdir”.
 
Anar əlavə edib ki, televiziya filminin rejissorluğuna Ramiz Həsənoğlunun adını təklif edəcək: “Mən çoxdandır Ramiz Həsənoğlu ilə bir yerdə çalışıram. Ona görə də, istəyərdim ki, bu filmi də Ramiz çəksin. Hər halda, mən onun adını təklif edəcəyəm”.
 
Qeyd edək ki, prezident İlham Əliyev “Dədə Qorqud” dastanları əsasında çoxseriyalı bədii televiziya filminin çəkilməsi haqqında sərəncam imzalayıb.
 
Çoxseriyalı bədii televiziya filminin çəkilişi ilə bağlı ədəbi ssenarinin hazırlanması və təşkilati məsələlərin həyata keçirilməsi məqsədilə 2013-cü il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan ilkin olaraq Mədəniyyət və Turizm Nazirliyinə 1 milyon manat ayrılıb.