Ölkəmizin ən nüfuzlu elm məbədi olan Azərbaycan Milli Elmlər Akademiyasının (AMEA) Mərkəzi Elmi Kitabxanası “Azərbaycanın Elm və Mədəniyyət Xadimləri” seriyasından görkəmli dövlət xadimi, Xalq Yazıçısı, ədəbiyyatşünas və publisist, Azərbaycan SSR Ali Soveti Rəyasət Heyətinin sədri olmuş, Sosialist Əməyi Qəhrəmanı, SSRİ və Azərbaycan Respublikasının Dövlət mükafatları laureatı, akademik Mirzə İbrahimovun əsərlərinin biblioqrafiyasını Azərbaycan, rus və ingilis dillərində nəşr etdirmişdir.

AMEA-nın Mərkəzi Elmi Kitabxanasından AzərTAc-a bildirmişlər ki, nəşrin tərtibçi müəllifləri filologiya elmləri doktoru Aybəniz Əliyeva-Kəngərli və İsmət Səfərovdur.

AMEA rəyasət heyətinin sərəncamına əsasən hazırlanan, professor Teymur Əhmədovun və Firəngiz Hüseynovanın redaktorluğu ilə işıq üzü görən biblioqrafiya Mirzə İbrahimovun 1930-2011-ci illər arasında Azərbaycan, rus, türk, fars, ingilis və digər xalqların dillərində nəşr olunmuş kitablarını, konqres, elmi sessiya və konfrans materiallarını, eləcə də dövri mətbuatda dərc edilmiş ədəbi-tənqidi və publisistik məqalələrini, habelə müxtəlif qəzetlərə müsahibələrini əhatə edir.

Göstəricidə əvvəlcə M.İbrahimovun kitabları, sonra dövri mətbuatda çıxmış əsərləri verilmişdir. Akademikin ədəbi-tənqidi və publisistik məqalələri isə xronoloji qayda ilə sistemləşdirilmişdir. Yazıçının həyat və yaradıcılığı haqqında, eləcə də tərcümə etdiyi əsərlər ayrıca bölmələrdə öz əksini tapmışdır.

Biblioqrafiyadan istifadəni asanlaşdırmaq məqsədi ilə Mirzə İbrahimovun əsərlərinin və onun haqqında yazan müəlliflərin adlarının əlifba göstəricisi də verilmişdir. Həmçinin görkəmli elm və mədəniyyət xadimlərinin M.İbrahimov haqqında fikirləri də biblioqrafik-göstəricidə öz əksini tapmışdır.

Biblioqrafik-göstərici Xalq Yazıçısı Mirzə İbrahimov haqqında hərtərəfli məlumat almaq istəyən oxucular üçün əvəzedilməz bir vəsaitdir. /AzərTAc/