"Qanun" nəşriyyatı tərəfindən dünya şöəhrətli türk yazıçısı, Nobel mükafatlı Orxan Pamukun "Atamın bavulu" kitapı çap edilib. Nəşriyyat həmçinin daha bir Nobel mükafatlı, Kolumbiyalı məşhur yazıçısı Qabriel Qarsia Markesin "Saat altıda gələn qadın" kitabını nəşr edib. Kitablar haqqında ətraflı məlumatla aşağıda tanış ola bilərsiniz.

Orhan Pamuk - ATAMIN BAVULU

“Ölümündən iki il əvvəl atam öz əlyazmaları və dəftərləri ilə dolu bir bavulu mənə verdi”.
 Orxan Pamuk 2006-cı ilin dekabr ayında, İsveçin paytaxtı Stokholm şəhərində Nobel ədəbiyyat mükafatını alarkən “Atamın bavulu” adlı nitqlə çıxış etdi. Pamukun otuz ilik yazıçılıq səylərinin ruhunu səmimi bir şəkildə ifadə edən bu duyğusal çıxış bütün dünyada böyük əks-sədaya səbəb oldu. Yazmaq və yaşamaq mövzusunda köklü bir mətn olan “Atamın bavulu”nu eyni mövzuları və dərdləri fərqli prizmadan toxunduğu iki başqa mükafat nitqi ilə birlikdə nəşr edirik. Pamukun ABŞ-da çıxan World Literature (“Dünya ədəbiyyatı”) jurnalı tərəfindən verilən “Puterbaugh mükafatı”nı alarkən 2006-cı ilin aprel ayında etdiyi çıxış – “Nəzərdə tutulan yazar” – yazarlıq psixologiyasının Pamuk tərəfindən izahıdır. Pamukun “Alman Kitabçılar Birliyi” tərəfindən verilən “Sülh mükafatı”nı 2005-ci ilin oktyabr ayında alarkən etdiyi “Qarsda və Frankfurtda” adlı çıxışı isə roman yazarının özünü başqalarının yerinə qoyma gücünü və bu insani bacarığın siyasi nəticələrini özündə əks etdirir. Kitaba yazıçının bütöv gördüyü bu üç çıxışdan başqa, 2008-ci ilin oktyabr ayında Türkiyədə çıxan “Milliyyət” qəzetində nəşr olunmuş “Mənim türk kitabxanam” adlı maraqlı yazısı da əlavə olunub.
 “Atamın bavulu” yazarlıq nədir, nə üçün yazırıq, həyat və yazmaq, yazarlıq səbri və roman sənətinin sirləri üzərinə yazılmış dəyərli bir kitabdır.

Bakı, Qanun Nəşriyyatı, 2013
100 səhifə. 1000 tiraj
Türkcədən tərcümə: Emin Əliyev
Nəşriyyat redaktoru: Xalid Kazımlı  
2.90 AZN


Qabriel Qarsia Markes - SAAT ALTIDA GƏLƏN QADIN

Kitaba məşhur Kolumbiya yazıçısı, Nobel mü­ka­fatı laureatı Qabriel Qarsia Markesin hekayə­ləri, həmçinin ədəbiyyat haqqında düşün­cələri, mü­sa­hibə və söhbətlərindən seçmə nümunələr da­xil edil­mişdir.

Bakı, Qanun Nəşriyyatı, 2013.
160 səhifə.  1000 tiraj.
Çevirəni, qeyd və şərhlərin müəllifi: Mahir N.Qarayev
Nəşriyyat redaktoru: Nüşabə Hüseynli
3.90 AZN
 

Avanqard.net