Fransız filosofu Le Bon iddia edir ki, heç bir xalq tarixdən ibrət götürməyib. Düzünə qalsa, düz deyir.Tarix xalqların daha çox kriminal, təcavüz, işğal yaddaşıdır. Biz türklərin tarixində həmişə bir şikəstlik olub; məsələn, Teymur topal idi, Şah İsmayıl romantik ruhlu şair idi, sultan Süleyman arvadbaz idi. Arxasını özünüz fikirləşin.

Bunları fikirləşdiyim yerdə Fizika elmləri doktoru, professor, hər yerin fəxri və müxbir üzvi Ələmdar müəllim otağa girib deyir ki, Allaha şükür, bu il “Eurovision” yarışmasında ikinci yerə dırmaşdıq. Deyir, deyim niyə? Çünki keçən il “Kristal sarayı”na toplaşan turistlər, tutalım,  pivəni anasından əmdiyi südündən çox istəyən almanlar ilk dəfə isti noxudla buz kimi “Xırdalan” pivəsi içib kütləvi qarınağrısına düşdülər. 

Az qala, Bakıya ilk gəlişi ilə özümüzə yeznə qayıracağımız Aleksandr Rıbak çiynindəki skripkanı unudub, illərdir ərə verməyə ağ atlı oğlan axtardığımız Elza xanımı marçamarç öpdü. Gədə öz evlərində inişil yığışıb onun Bakıdakı toy kasetinə baxan qohumlarına məhz bu marçamarç haqqında belə danışırmış: “İnana bilmirdim ki, onun hamısı mənimdi”. Bunu məhlədə göysatan arvadlardan eşitmişəm. 

“Eurovision” bitdi, biz ikinci yerə çıxdıq – həmd olsun ilahiyə ki, bizimkilər udmadı, yoxsa bu əlimişarlı xalqımız özünə əl qatıb, toyuq hinlərini, mal tövlələrini, “restavrasiyalayıb” ağardacaq, ağarmış saçlarına isə rəng qoyub qaraldacaqdı. 

Keçən ilki yarışmada gecəqondu sürətiylə tikilmiş “Kristal saray” xeyli populyarlıq qazanıb paytaxtdakı bütün şadlıq saraylarının göz dağına çevrilmişdi. Amma indi gör bu il onun aqibəti nə olacaq? Xalqımızın bütün yekəqarın xadim və xadimələri burda xeyir-şər məclisləri təşkil etmək üçün bəhsə girəcəklər; Bu il burada müğənnilərlə yanaşı, həm də mollalar oxuyacaq, dəlləklər ülgüclərini itiləyib oğlan uşaqlarını sünnət, yəni mikroedam  edəcəklər. O, “Kristal sarayı” bizimkilər “Xrustal saray” eləməsə, Azərbaycanın çörəyi Rıbakın burnundan gəlsin. Bir də görəcəksən gəlin maşınları dalbadala düzülüb. Televizor bağırır: “Bu gün “Eurovision” keçirilən yerdə Filankəsov Filankəs müəllimin oğlu, Bəhmənkəsov Bəhmənkəsin həm kiçik, həm də böyük toyudur” və sözsüz ki, mikrofonlar həmin o Filankəsov Filankəs müəllimə tuşlanacaq:

Filankəs müəllim: “Mən əhd etmişdim ki, “Eurovision”da birinci yerə çıxsaq, uşağın kiçik toyu ilə böyük toyunu bir günə salacağam. Şükürlər olsun ki, çox yubanmadı, yoxsa uşağın yaşı otuzu haqlamışdı”. 

Hələ gör toyun ortasında nə olacaq, Səltəm-seyrək fransız qızının “İ want to have sex” mahnısı oxuduğu bu “Kristal zalda” bizim yekəqarın kişilər özlərinin sənət vurğunu olduqlarını göstərmək üçün Gülüstan Əliyevaya bu mahnını sifariş verib oynayacaqlar: “Mən gedərəm o oğlana, onun pulu çox olsun”.  Bir də görəcəksən qalustuklu on-on beş kişi, yanlarında da üzü qara, saçı sarı, çantası qırmızı, donu mavi, bir sözlə, al-əlvan dəvədəlləyinə oxşayan  beş-altı zənən girdi zala; kişilərdən biri masadan qışqıracaq: “Ə, Fərəməz, yeməyə nəyün var?” Fərəməz də yağlı əllərini üstünə silə-silə çıxacaq meydana, sanki, vurma cədvəlini söyləyirmiş kimi, üyüdüb-tökəcək: “Həmdulla müəllim, lülə, tikə, qaban, piti, mal souzu, kələfur, dolma, cız-bız...” Həmdulla müəllim də əlini qarnına çəkib qonaqların yanında şellənəcək: “Ə, Fərəməz, gör nə deyirəm, o rəqqasə Fatiməni tap, gəlsin bizi şənləndirsin, keçən dəfəki kimi də qonaqların yanında mənnən pula görə cırt-pırt eləməsin. Denən Həmdulla müəllim deyir ki, beynimi çöndərməsin”. 

Axundovun dərviş Məstəlisi o vaxt arvad-uşağın yanında cadu ilə Parisi “dağıtdığı” kimi, indiki Məstəlilərimiz də gör “Kristal saray”ın başına nə hoqqalar gətirəcəklər. Bir də gördün, Həmid Herisçi bu sarayda ələmi çərpələng kimi uçurur.  

Allah haqqı, bizim işimiz Allaha qalıb. /publika.az/