Azərbaycan Dövlət Mədəniyyət və İncəsənət Universitetinin 90 illik yubileyi çərçivəsində bu tədris müəssisəsinin silsilə tədbirləri davam edir.  Ümummilli lider Heydər Əliyevin təşəbbüsü ilə ÜDKİ-də tanınmış sənətkar Yevgeni Matveyevin “Aktyorluq” emalatxanasını bitirən, hal-hazırda ADMİU-da pedoqoji fəaliyyətlə məşğul olan sənətkarlar ustadlarının anım mərasiminə yığışdılar. 

Tədbiri açan “Kinoşünaslıq” kafedrasının müdiri Aydın Dadaşov həmin dövrdə digər sənətkar Sergey Gerasimovun emalatxanasını bitirən qırğız tələbələrin təklifi ilə ölkələrinin ərazisindəki Pamirin dağ zirvələrinin birinə ustadlarının adının verilməsini xatırlatmaqla ADMİU-nun arxasındakı adsız küçəyə Yevgeni Matveyevin adının verilməsi ehtimalını qədirşünaslıqla yanaşı, xalqlar dostluğuna xidmət edəcək addım saymışdır.  

ADMİU-nun kadr hazırlığı prosesində Yevgeni Matveyevin tələbələrindən; “Aktyorluq” fakültəsinin dekanı Ötkəm İsgəndərovun, sənət müəllimləri Sona Mikayılovanın, İsrafil İsrafilovun, “Dünya kino tarixi” fənnini tədris edən Həmidə Ömərovanın, Fərqanə Quliyevanın əməyini dəyərləndirmişdir. Yevgeni Matveyevin tələbələri KİV nümayəndələrinə müsahibələr vermişdir.

Sənətşünaslıq fakültəsinin dekanı Vəfa Əliyev ADMİU-nun 90 illik yubileyi çərçivəsindəki silsilə tədbirlərin  davam etdiyini bildirmişdir.