Bolqarıstanın ilk ali təhsil ocağı, Müqəddəs Kliment Oxridski adına Sofiya Universiteti 2013-cü ildə özünün 125 illik yubileyini qeyd edir. 23-26 mayda Bolqarşünaslıq üzrə III Beynəlxalq konqresin keçirilməsi bu əlamətdar tarixlə bağlı baş tutan əsas tədbirlərdən biri oldu. Forum Bolqarıstan Respublikasının Prezidenti Rosen Plevneliyevin himayəsi və YUNESKO-nun dəstəyi ilə keçirilir. Forumun işində Avropa, Asiya və Amerikadan olmaqla 500-dən çox görkəmli alimlər iştirak edirlər. Bolqarşünaslıq üzrə I və II Konqreslər müvafiq olaraq, 1981 və 1986-cı illərdə keçirilmişdir. Sonralar, təxminən otuz il müddətində bu  ənənəyə ara verilmiş, xarici ölkələrdəki bolqarşünaslıq mərkəzlərinin bir hissəsinin fəaliyyəti dayandırılmışdı. Sofiya Universitetinin 125 illik yubileyi sözügedən konqresin keçirilməsi ənənəsinin bərpası üçün yeni zəmin yaradır.  Konqres təşkilatçılarının fikrincə, bu Forumun keçirilməsi dünya bolqarşünaslığının hazırkı durumunu xarakterizə edən real vəziyyəti qiymətləndirmək baxımından mühüm əhəmiyyətə malikdir. 

Sofiya Universitetinin rektoru prof. İvan İlçevin dəvəti ilə Bakı Slavyan Universitetinin rektoru, Əməkdar elm xadimi, AMEA-nın müxbir üzvü prof. Kamal Abdullayev Forumun işində iştirak etmək üçün Bolqarısanın paytaxtına gəlmişdir. 

Mayın 24-də bolqarşünaslıq üzrə III Beynəlxalq konqresin rəsmi açılışı oldu. Rəsmi mərasim çərçivəsində prof. Kamal Abdullayevə Sofiya Universitetinin ali mükafatı – «MAVİ LENT FƏXRİ NİŞANI»  (“HONORARY  BLUE  RIBBON INSIGNIA”)  təqdim edildi. Bu mükafatın verilməsi haqqında qərar həmin universitetin 2012-ci il, 19 dekabr tarixində keçirilmiş Elmi Şurasının toplantısında qəbul edilmişdir. 

Cavab nitqində prof. Kamal Abdullayev elmi fəaliyyətinə yüksək dəyər verən və Azərbaycanda bolqarşünaslığın inkişafına verdiyi töhfələri qiymətləndirən  Sofiya Universitetinin Elmi şurasına öz minnətdarlığını bildirdi. 

Səfər çərçivəsində BSU-nun rektoru prof. Kamal Abdullayev Sofiya Universitetinin rektoru prof. İ. İlçev Kliment Orxidski adına Sofiya Universitetində Azərbaycan dili Mərkəzinin yaradılması ilə bağlı Saziş imzalamışlar. 

Mərkəzin fəaliyyətə başlaması Azərbaycan dili və mədəniyyətinin Avropada təbligi və tanınması sahəsində vacib rol oynayacaqdır. Qeyd etmək lazımdır ki, BSU-nun «Xarici ölkələrdə Azərbaycanşünaslığın inkişafı» proyekti çərçivəsində Rusiya, Ukrayna və Belarusun bir sıra ali təhsil ocaqlarında yaradılmış Azərbaycan dili və mədəniyyəti mərkəzləri uğurla fəaliyyət göstərirlər. Sevindirici haldır ki, Sofiya universitetindəki Azərbaycan dili və mədəniyyəti Mərkəzi Balkanlarda yaradılmış ilk bu tipli təsisatdır.