Bunu açıqlamasında “Əli və Nino” kitab mağazaları şəbəkəsinin rəhbəri və Milli Kitab Mükafatının təsisçisi Nigar Köçərli bildirib. 

O, qeyd edib ki, qalmaqal yaranmaması üçün ad çəkmək istəmir: "Söhbətin kimdən getdiyini gənc yazar özü bilir. Sizin sayt vasitəsilə Milli Kitab Mükafatının təşkilat komitəsi adından bir neçə yazara xəbərdarlıq etmək istəyirəm. Onluğa düşən gənc yazarlar arasında özünü tapşırtmağa çalışanlar var. Bu məlumat mənə çatdı. Birinci xəbərdarlığı edirəm,  amma ikinci dəfə bu təkrarlandıqda həmin yazar onluqdan xaric olunacaq.  Bir sözlə, bu ilkin xəbərdarlıq idi və bundan sonra konkret addım atılacaq". 

N.Köçərli əlavə etdi ki, mükafatın təsisçisi kimi daima münsiflərlə ünsiyyətdə olur: "İlk dəfədir ki, belə xoşagəlməyən halla rastlaşdım. Bu gənc yazar öz əsərini müəyyən yollarla münsiflərə göndərir və özünü tapşırır. Artıq münsiflərə də müəyyən yerlərdən zənglər var ki, filan əsəri oxuyanda diqqətli ol. Bu da çox xoşagəlməyən haldır. İndiyə qədər bizdə belə hal olmayıb ki, kimisə mükafatdan kənarlaşdıraq, amma bu cür hallar davam edərsə müəllif  mütləq onluqdan xaric olunacaq”. /teleqraf.com/