Görəsən bizim təqaüdçülər nə işlə məşğuldular?

Sualın özün də bir səhv var... Təqaüdçülər ona görə təqaüdçüdülər ki, onlar artıq işlədiklərini işləyiblər. Və onların işlədikləri mühit, indi onlara yaşamaq imkanı verməlidir... Bu gün dünyada, stabil yüz il yaşamış hansısa bir ölkə tapmaq mümkün deyil. Siyasət, iqtisadiyyat dəyişkəndir. Və sosial siyasəti də dəyişdirəndir. Gənc olarkən Sovetin vergilərini ödəyən bu günün azərbaycanlı təqaüdçüsü yeni Azərbaycan dövlətinin pensiyasını alacağını düşünmürdü. Düşünə də bilməzdi. Onda şəxsi maraqlar kontekstində təqaüd prinsipi nə qədər təkmildir? İndiki Rusiya hökuməti, keçmiş Sovetlərin vəd etdiyi təqaüdləri, haqqını tələb edən təqaüdçülərə verməməkdə haqlıdırmı? Əslində pulun inflyasiyaya uğrayıb uğramayacağını kim qabaqcadan bilir ki? Dövlətlərin bir işlək hökumət kimi kardinal sürətdə dəyişib-dəyişməyəcəyi də proqnozlaşdırıla bilməz. Onda nə etməli?

Müxtəlif ölkələrdə bu məsələ müxtəlif cür çözülür. Əsas olan isə, fikrimcə, cəmiyyətin ruhani mühitinin təkmilləşməsidir. Bu günün gerçəkliyi rəqabətdir. Ayaqda olmasan, kimisə yıxmasan, səni yıxanlardan qurtrulmasan səni heç kəs qəbul etməz. Bu gün hamı bu günlə yaşadığı halda və bu yaşanan gün kapitalizmin gerçəkliyi olduğu halda, sabaha pul yığan bir qoca və zəif ahıl nə qədər aktualdır? Qəddar gerçəklik kontekstində heç aktual deyil. Milli, etnopsixoloju və ənənə müstəvisində isə hələ şükür ki, diridir. Bizim təqaüd siyasətimiz daha çox oğulların və qızların çiynindədir... Bu baxımdan, biz dünyaya örnək ola biləsi insanlarıq...

Cəmiyyətdə insaf, böyüyə hörmət, kasıba əl tutmaq ənənəsi nə qədər qalacaqsa, hökumət də, xalq da bu göstəricilərə görə inkişafda olacaq. Ona görə də bu keyfiyyətlərin itməməsi üçün ilk öncə ziyalıların da çabaları mütləq olmalıdır.

Mən demirəm ki, İnsaf Nazirliyi yaradaq... Mən onu deyirəm ki, olan qalan insafımızı da rəqabətdə itirməyək. Kim nə boydadırsa, gec tez o boyda da görünür. Qocalarsa bizim heykəllərimizdir.

Qurbanlıqda qoyun kəsib, ət biznesini çiçəkləndirməkdənsə, bir iki qocanın cibini çiçəkləndir... On dənə maşın alab, şəhərdə tıxac yaratmaqdansa, bir qocalar evinə yardım et...

Son vaxtlar yazılara belə, tamam başqa cür yanaşırlar. Kim nədən yazırsa, onun o probleminin olduğunu düşünürlər. Buda yeni dövrün qeyri peşəkarlarının yaratdığı gerçəklikdir... Mən sadəcə Başqalarını da düşünməyi də yadırğamamışam...

Əsil təqaüdü və qiyməti təqaüdçülərə xalq verir... Bu gün xalq bunu edirmi? Ya xalqın başı özünə qarışıb... /aznews.az/