Dərgi baş redaktorun qeydləri ilə açılır. Anım başlığıyla Məhsəti Gəncəvinin  900 illiyinə həsr olunmuş  yazı və şairənin rübailərindən nümunələr  verilib. 

Nəsr bölməsində  Aslan Quliyevin “Qızılquş və mən”, Azad Qaradərəlinin “Kuma-Manıç” çökəkliyi romanlarının son hissəsi, Alpay Azər, Güntay Gəncalp, Şahnaz Kamal və Alik Nağıoğlunun hekayələri çap olunub.  “Bir kitab şeir”  başlığında Sevinc Elsevərin,  poeziya başlığında isə  oxucular  Mahir Mehdi, Cavidan, Bəxtiyar Hidayət,  İradə Aytel,  Əli Şirin Şükürlü, Sərdar Amin, Esmira Məhiqızı, Sara Selcan və Avşar Eyvazın  şeirlərini oxuya biləcək.

“Sözümüzün yiyələri” adı altında Ə. Haqverdiyevin “İt oyunu”, “Yazıçının arxivindən” rubrikasında Sabir Əhmədlinin “Gör-götür dünyası” hekayələri, “Ədəbiyyat söhbətləri”ndə isə yazıçı Kamal Abdulla ilə söhbət oxuculara təqdim olunur. Güneyli yazarlar Məlihə Əzizpur və Ülkər Ucqarın şeirləri “Güney sovqatı” başlığıyla verilib. Hər nömrədə olduğu kimi bu dəfə də gənclərə  xüsusi yer ayrılıb.

İlk addımlar adı ilə Arzu Hacıyeva, Taleh Eminoğlu, Günel Eyvazlı, Faiq Hüseynbəyli və Həmid Pirinin yazıları verilib. Çevirmə başlığında Volterin, Ç.Bukovskinin,  M.Kunderanın (Araz  Gündüz və Namiq Şamanın tərcüməsində)  və başqalarının əsərləri dərc olunub. Dərginin essestika  bölümündə  Niyazi Mehdi, Tehran Əlişanoğlunun, “Baxış bucağı”nda isə Seymur Baycanın yazıları yer alıb.

“Palirta” bölümü gənc Amerika rəssamı Erika Kreykin sualtı rəsmlərinə  həsr olunub. Dərginin yeni sayında ədəbiyyat xəbərləri və digər yazılarla da tanış olmaq olar.

“Yazı” dərgisinin yeni sayını  “Azərmətbuatyayım”ın və “Metroservis”in köşklərindən əldə etmək mümkündür.

Avanqard.net