Beynəlxalq Türk Mədəniyyəti və İrsi Fondunun prezidenti Günay Əfəndiyeva İsveçrənin Bern şəhərində Türkiyə Respublikasının İsveçrə Konfederasiyasında və Lixtenşteyn Krallığındakı səfirliyi və Sürix şəhərindəki Baş Konsulluğu tərəfindən təşkil edilmiş Türkiyə Respublikasının 100 illiyinə həsr olunmuş tədbirdə iştirak edib.

Fonddan bildirilib ki, tədbirdə çıxış edən Türkiyə Respublikasının İsveçrə Konfederasiyasındakı səfiri Emine Ece Özbayoğlu Acarsoy Qazi Mustafa Kamal Atatürkün “ən böyük əsərim” adlandırdığı Cümhuriyyətin Türkiyənin demokratikləşməsinin, inkişafının və müasirləşməsinin təminatı olduğuna diqqət çəkərək, ölkənin nüfuzunun gündən-günə artmasının qürurverici olduğunu vurğulayıb. O, həmçinin qəhrəman Azərbaycan Ordusunun həyata keçirdiyi uğurlu antiterror tədbirləri nəticəsində Prezident İlham Əliyev tərəfindən üçrəngli Azərbaycan Bayrağının Xankəndidə ucaldılmasının bütün Türk dünyasını duyğulandırdığını, bununla da regionda daimi sülh və sabitliyin əldə olunması yolunda mühüm maneənin aradan qaldırıldığını qeyd edib.

Səfir Beynəlxalq Türk Mədəniyyəti və İrsi Fonduna Türkiyə Respublikasının yaranmasının 100 illiyinin il ərzində müxtəlif layihələrlə təntənəli şəkildə qeyd edilməsinə görə minnətdarlığını bildirib, təşkilata türk mədəni irsinin qorunması və təbliğində uğurlar arzulayıb.

Beynəlxalq Türk Mədəniyyəti və İrsi Fondunun prezidenti Günay Əfəndiyeva Türkiyə Respublikasının yaranmasının 100 illiyi münasibətilə tədbir iştirakçılarını təbrik edərək, Türkiyənin qədim tarixdən günümüzə qədər davam edən bir qəhrəmanlıq salnaməsi, Türk dünyasının birliyini və ortaq gələcəyini dəstəkləyən böyük güc olduğunu bildirib. Fondun prezidenti 1923-cü ildə Böyük Öndər Mustafa Kamal Atatürk tərəfindən yaradılmış Türkiyə Cümhuriyyətinin hazırda Prezident Rəcəb Tayyib Ərdoğanın rəhbərliyi ilə dünyanın qüdrətli, böyük siyasi çəkiyə malik ölkələrindən biri olduğunu vurğulayıb.

Günay Əfəndiyeva çıxışında türk xalqlarının çoxəsrlik tarixinin və zəngin mədəniyyətinin təbliği istiqamətində təşkilatın fəaliyyət və məqsədlərindən söz açaraq, qonaqlara Fondun himayəsi altında yaradılmış və yeddi türk dövlətini - Azərbaycanı, Qazaxıstanı, Qırğızıstanı, Türkiyəni, Özbəkistanı, Türkmənistanı və Macarıstanı təmsil edən peşəkar qadın musiqiçilərdən ibarət “Yeddi gözəl” musiqi qrupunu təqdim edib.

Sonra Türkiyə Respublikasının Prezidenti Rəcəb Tayyib Ərdoğanın “29 Oktyabr - Respublika Günü” müraciəti oxunub.

Tədbir Fondun himayəsində yaradılmış “Yeddi gözəl” musiqi qrupunun konserti ilə davam edib.

Tədbirdə İsveçrə Xarici İşlər Nazirliyinin rəhbərliyi, ölkədə akkreditə olunan diplomatik korpusun, beynəlxalq təşkilatların, dövlət qurumlarının, işgüzar və akademik dairələrin nümayəndələri, eləcə də türk icmasının üzvləri və KİV-in təmsilçiləri iştirak ediblər.