Şimali Makedoniyanın “Beynəlxalq Vizyon Universiteti”nin rektoru, professor Fadil Hoca və prorektoru Abdülməcid Nurəddin Bakı səfəri çərçivəsində “Yeni Müsavat” Media Qurupunun qonağı olub. Media Qurupunun rəhbəri Rauf Arifoğlu ilə keçən görüşdə Fadil Hoca rəhbəri olduğu universitet haqqında ətraflı məlumat verib:

“2000-ci ildə Şimali Makedoniya, Balkan türkləri olaraq öz ana dilimizdə universitet qurmağı düşündük və 2015-ci ilə qədər bu barədə mücadilə edərək, haqqımızı qazandıq və ən nəhayət Makedoniya dövləti Nazirlər Kabinetinin qərarı ilə “Beynəlxalq Vizyon Universiteti” adı altında 2014-cü ilin noyabrında qeydiyyatdan keçdik. Beləliklə, Osmanlı imperiyasının Balkanlardan çəkilməsinin 100-cü ildönümündə Balkan türkləri öz ana dilində ali təhsil ocağına sahib oldular. Ona görə də universitetimizin sloqanlarından biri bu cürdür: "Vizyonla bir əsrə atılan imza!" Yəni 1 əsr sonra Balkanlarda tarix təhsil sahəsində təkərrür edib (təkrarlanıb).
Beləliklə, 2015-ci ildən etibarən universitetimiz fəaliyyət göstərməyə başladı. Universitetimiz Qostivar şəhərinin mərkəzində, Vardar çayı sahilinin yaxınlığında yerləşir. Onu da qeyd edim ki, universitetimizin texniki təchizatı yüksək səviyyədə təşkil olunub.

Bütün proqramlarımız bakalavr və magistatura səviyyəsindədir. Universitetimizdə 5 fakültə var. Bunlar Hüquq, Psixologiya, İnformatika, Memarlıq, İqtisad fakültələridir. Xüsusilə qeyd etmək istəyirəm ki, universitetimizdə həmçinin Klinik Psixologiya üzrə doktorantura ixtisası var və bu ixtisas bütün Balkanlarda yalnız bizdə mövcuddur.

“Beynəlxalq Vizyon Universiteti” yeganə universitetdir ki, Makedoniya sərhədlərindən kənarda Avropada təmsilçiliyi var. 2018-ci ildən etibarən Avstriyanın paytaxtı Vyanada da fəaliyyət göstəririk. Makedoniyada təhsil türkcə, Vyanada isə türk və ingilis dilində tədris olunur. Lakin onu qeyd edim ki, Vyana məlum olduğu kimi bahalı şəhər olduğu üçün oradakı təhsil ödənişi də nisbətən bahadır.

Hazırda 62 universitet ilə əməkdaşlığımız var ki, onlardan da 42-si Türkiyənin dövlət universitetləridir. Balkan, Orta Asiya və Cənub Şərq Avropa universitet birliklərinin üzvüyük. Baxmayaraq ki, universitetimiz yeni yaranıb, 2020-ci ildə Cənub Şərq Avropa universitetlər birliyinin rəhbərliyi məhz bizim universitetə həvalə olundu. Bizim istiqamətimiz Avropa təhsil sisteminədir. Müəllimlərimiz əsasən Şimali Makedoniyadan, Balkanlardan və Türkiyədən olan mütəxəssislərdir".

Xəbərin bu bölümündən sonranı sual-cavab janrında təqdim edirik:

- Universitetinizin tələbələri hansı ölkələrdəndirlər?

- Universitetimizin hazırda 1076 tələbəsi var. Tələbələrimiz də əsasən Makedoniya, Kosova, Bosniya-Hersoqovina, Türkiyə vətəndaşlarıdır.

- Azərbaycandan da tələbələriniz varmı?

- Azərbaycandan tələbələrimizi məmnuniyyətlə gözləyirik. Ötən gün Qarabağa, Ağdama getmək imkanımız oldu və erməni vandalizmini, vəhşiliyini öz gözlərimizlə gördük. İstərdik ki, Qarabağ şəhid ailələrindən olan 5 tələbəyə ödənişsiz təhsil verək. Bu şəkildə can Azərbaycan qardaşlarımıza sahib çıxmaq istəyirik. Həmin tələblər universitetimizin bütün imkanlarından istifadə edə biləcək. Hansı ki, Türkiyədən olan şəhid ailələrin övladları da universitetimizdə pulsuz olaraq təhsil alırlar.

- Universitetinizin diplomları Avropada tanınırmı?

- Universitetimiz tam Avropa universitetidir, ona görə də diplomlarımız Avropa ölkələrində verilən diplomlarla eyni hüquqa malikdir.

- Məsələn, bir azərbaycanlı tələbə sizin universitetinizin məzunu olduqdan sonra Avropada iş tapa biləcəkmi?

- Əlbəttə. Bizim universitetimiz Avropada kifayət qədər tanınır.

- Bəs universitetin təhsil üçün ödənişləri nə qədərdir?

- Sərfəlidir. Lakin qeyd etdiyim kimi, Vyanada qiymətlər bir qədər bahadır. Əlbəttə ki, Makedoniyada və yaxud Vyana şöbələrinin hansında oxumaq istəyi tələblərin öz seçimidir.

- Azərbaycan universitetləri ilə də əməkdaşlıq etməyi düşünürsünüzmü?

- Bəli. Bakıda İqtisad Universiteti ilə əməkdaşlığımız var. Hətta 2019-cu ildə universitetimizin 5 tələbəsi qonaq qismində İqtisad Universitetinə gəldi. Qarşılıqlı olaraq Bakıdan tələbələr universitetimizə gəlməli idi, lakin pandemiya səbəbindən bu proses dayandırıldı. Bundan sonra Bakıdan tələblərin gələcəyi gözlənilir.
Bir azərbaycanlı tələbə “mən Avropaya gedib, orada türkcə təhsil almaq istəyirəm”, deyərsə o zaman biz onu dəvət edirik. Hətta ingilis dilini bilməsə belə problem yoxdur, tam türkcə təhsil ala bilər. Eləcə də Vyanada istərsə türkcə, istərsə ingilis dilində təhsil ala bilər”.

/Musavat.com/