Azərbaycan Milli Elmlər Akademiyasının Nizami Gəncəvi adına Ədəbiyyat İnstitutunda amerikan yazıçısı Ernest Heminqueyə həsr olunmuş “Ernest Heminquey: yeni nəsr və müasir insan” mövzusunda elmi sessiya keçirilib.

Tədbiri giriş sözü ilə AMEA-nın vitse-prezidenti, Nizami Gəncəvi adına Ədəbiyyat İnstitutunun direktoru, akademik İsa Həbibbəyli açaraq Ernest Heminqueyin yaradıcılığı haqqında hərtərəfli şəkildə bəhs edərək onun əsərlərinin dünya ədəbi xəzinəsində öz yeri olduğunu qeyd edib. Akademik XX əsr dünya nəsrinin görkəmli yaradıcılarından biri olan Ernest Heminqueyin “Qoca və dəniz” əsərini II Dünya müharibəsindən sonra bəşəriyyəti sülhə çağıran ən yaxşı əsərlərdən biri kimi nümunə göstərib. O, Heminqueyin Azərbaycanda da çox sevildiyini, əsərlərinin tərcümə olunaraq dəfələrlə çap olunduğunu diqqətə çatdırıb. Həmçinin vurğulayıb ki, onun Naxçıvan Dövlət Universitetinin rektoru olduğu vaxtlardaErnest Heminqueyin həyat və yaradıcılığına aid dissertasiya müdafiə olunb, görkəmli yazıçıya həsr edilmiş konfrans keçirilib.

Daha sonra ABŞ Səfirliyinin Mətbuat şöbəsinin müdiri Natan Cons çıxış edərək Amerika yazıçısının həyat və yaradıcılığından danışıb. O, Ədəbiyyat İnstitutuna təşkilatçılığa görə minnətdarlığını bildirib.

Sessiyada Dünya ədəbiyyatı və komparativistika şöbəsinin müdiri, professor Gülər Abdullabəyli “Ernest Heminqueyin əsərləri Avropa dillərində”, Dünya ədəbiyyatı və komparativistika şöbəsinin böyük elmi işçisi, filologiya üzrə fəlsəfə doktoru Şükufə Vəliyeva “Ernest Heminqueyin əsərlərinin strukturu və Amerikan taleyi”, filologiya elmləri doktoru, dosent Səkinəxanım Vəliyeva “Azərbaycan filoloji və ədəbi mühitində Ernest Heminquey yaradıcılığı” mövzusunda məruzələrlə çıxış ediblər.

Tədbirə Naxçıvan Dövlət Universiteti də video-konfrans vasitəsilə qatılıb. NDU-da fəaliyyət göstərən Ernest Heminquey Mərkəzinin direktoru, filologiya üzrə fəlsəfə doktoru, dosent Xumar Məmmədovanın “Ernest Heminquey Mərkəzinin fəaliyyəti” adlı məruzəsini video-konfrans vasitəsilə sessiya iştikakçıları da dinləyib.

Tədbirdə nasir, publisist, Hemenqueyin əsərlərini dilimizə tərcümə edən Nəriman Əbdülrəhmanlı çıxış edərək yazıçı ilə bağlı fikirlərini bölüşüb.

Qeyd edək ki, tədbirdə Bakı Dövlət Universiteti, Azərbaycan Dövlət Pedaqoji Universiteti, Azərbaycan Dillər Universiteti də təmsil olunub.