Səxavət Sahil

(Üçpərdəli mini pyes)
Dram-dialoq

İştirakçılar:
Anar müəllim – Ağsaçlı yazçı, müdrik yaşında
Əyan – Anar müəllimin əyanı, orta yaşlı
Bazər – Yaltaq və müti, məsləksiz, 55 yaşında həmişəcavan
Yazarlar
Rəqqasələr

I pərdə

Hadisə XXII əsrdə baş verəcək.
“1002 gecə” şadlıq evi. Ədəbi yaltağın yubileyi qeyd olunur. Anar müəllim yaxın adamları ilə səhnəyə daxil olur. Bazər əllərini ovuşduraraq boynubükük halda qaça-qaça Anar müəllimə yaxınlaşır.

Bazər: (Asta və müti səslə) Salam Anar müəllim. Xoş gəlibsiniz, qədəmləriniz mübarək, qədəmlərinizə qurban olub, yaxşı ki gəldiniz, məni sevindirdiz, Anar müəllim qurban olaram sizə, Anar müəllim... (yalandan hönkürmək istəyir, hönkürə bilmir).

Anar: (Yanpörtü baxaraq, saymazyana tonda) Salam Bazər, salam, gəldik də, day neyləyək, gəldik.

Bazər: Keçin yuxarı başa, geçin əyləşin, qurban olaram sizə, Sizsiz məclis heç nə olardı, nə yaxşı gəldiniz, qurban olaram sizə (Anar müəllimin əlindən öpmək istəyir, Anar müəllim onu itələyir).

Anar: Yaxşı, yaxşı, lazım deyil, kənardan baxırlar, get burdan, ayıbdır, sən cəhənəm, burdakıların mənə hörməti var. İmkan ver əyləşim, ayaq üstə saxlama məni, get, sonra danışarıq.

Bazər: Oldu Anar müəllim, sonra danışarıq, rahat dincəlin, gedirəm. Nə lazımdı gətirəcəklər, sizə ayrıca stol ayırmışam, Ağ Qoç və Qara Qoç kababları çəkdirmişəm, təki siz məndən razı qalın, qurban olaram sizə, qurban olaram... (Anar müəllimin onu sözünü kəsir, əl hərəkəti ilə getməsini bildirir).

Anar: (Acıqlı halda, çəmkirir) Yaxşı, yaxşı get, get.

Bazər səhnəni tərk edir. Anar müəllim əyləşir. Ətrafına baxır. Gecə düşüncələrinə dalır. Ətrafdakı adamları bir-bir, diqqətlə süzür. Səbəbkarı başqa vaxt adam yerinə saymayanların, indi onun haqqında ucuz təriflərini ikrah hissi ilə dinləyir. Badəsinə süzülən sərin sudan bir qurtum alıb, rahatlanmaq istəyir. Bazər yenidən səhnəyə daxil olur, Anar müəllimə yaxınlaşır.

Bazər: (İkiqat əyilərək əllərini ovuşdura-ovuşdura, müti səsələ) Anar müəllim inciməyin, mən yenə qayıtdım. (Bu zaman səhnədəki müğənni, Nisə Qasımovanın məşhur “Mən yenə qayıtdım” mahnısını oxuyur) Narahat oldum e, ürəyim burda qaldı. İcazə verin özüm sizə qulluq edim, ofisiantlıq edim, cavanlığım yadıma düşüb, özüm sizə xidmət edim.

Anar: (Acıqlı halda) Sağ ol, heç nə lazım deyil, peşiman eləmə məni, get burdan.

Bazər təzim edə-edə səhnəni tərk edir. I pərdə sona çatır.

II pərdə

Anar müəllim ona salam verən, şəkil çəkdirən adamlara candərdi gülümsəyir. Ədəbi yaltağın yubileyi şəninə ucuz təriflər, havayı sağlıqlar bir-birin əvəz edir, mərasim qədim Romadakı imperator sarayında keçirlilən eyş-işrət məclislərini xatırladır. Yarıçılpaq incəbelli gözəllər yazarların yan-yörəsində rəqs edirlər. Anar müəllim yenə Gecə düşüncələrinə dalır. Səbəbkarı təbrik edənlər bir-birini əvəz edir. Yazarlar, ədəbiyyat adamları onun yaradıcılığından başqa hər şeyindən danışırlar. Hətta müti olduğunu sətiraltı deyənlər də var. Anar müəllim onların sözlərini “xalaxətrin” janrında olduğunu başa düşür, cəfəngiyat və boğazdanyuxarı sağlıqları dinləməkdə davam edir. Anar müəllim yanındakı əyanına üzünü tutur.

Anar: Görürsən də, hamısı yalandan tərifləyir, elə bil Dantenin yubileyidir. Növbəyə durublar e, bir-birlərinə Macal vermirlər. Mənasız sözlərdi, cümlələrin bir-biri ilə Əlaqəsi belə yoxdur.

Əyan: Yubiliyar çox narahatdır, üzündə bir Vahimə var. Elə bil Beşmərtəbəli evin altıncı mərtəbəsinə çıxıb indicə özünü atacaq.

Anar: Çox müti adamdı, yerimə göz dikənlərlə dostluq edir, öz aləmində siyasət işlədir, bütün çəbhələrə işləyir, bundan nə desən gözləmək olar. Ondan çox şikayətlər gəlir, deyirlər özünə Təhminə tapıb, ona Zaurluq eləyir.

Əyan: Hə elədir, hamı onun Zaurluğundan danışır, kabinetini Otel otağına döndərib. Şəhərin yay günlərində küçədə qol-qola gəzirlər. Bazər hansı tədbirə gedir Təhminəsin də özünün Qırmızı "Limuzin"ində aparır.

Anar: İki dəfə çağırıb itin sözün demişəm, gərək xoruzunu qoltuğuna verib göndərəm. Kimə işi düşür onları dəvət edib, ipıqırıq adamdı.

Anar müəllim dilxorluğunu düzəltmək üçün üstünə Gürcü familiyası yazılan şərabdan qurtum-qurtub içib yazarların qurşaqdan aşağı təriflərinə qulaq asır. II pərdə sona çatır.

III pərdə

Bazər yenidən səhnəyə daxil olur, Yaxşı padşaha təzim edirmiş kimi təzim edir. Anar müəllimin əyləşdiyi stola yaxınlaşır.

Bazər: Anar müəllim, qurban olaram sizə, icazə verin bir söz deyim, xahiş edirəm...

Anar: De görək nə deyirsən?

Bazər: Keçin günahımdan, dəyişdiyim ədəbi cəbhələrə görə keçin günahımdan, qurban olaram sizə...

Anar: (Anar müəllim ona cavab vermir) ...

Bazər: Qurban olaram sizə, icazə verin qəbulunza gəlim, sizə sözüm var, keçin günahımdan, görüşmək istəyirəm sizinlə,

Anar: (Anar müəllim ayağa qalxır, əyanına getmək işarəsi edir) Gedək, gecdi, Gün keçdi, yaxşı Mütləq görüşərik.

Göy guruldayır, ildırım çaxır, ətrafa at kişnərtisi yayılır. Qara-qışqırıq, vay-şivən səsləri gəlir. İşıq sönür. III pərdə sona çatır

Son