Nicat Qafuroğlu - Qızını imtahana gətirən atanın həbsi

01.12.17

Avanqard.net gənc yazar Nicat Qafuroğlunun "Narıngül" hekayəsini təqdim edir.

Maşının şüşəsindən dəniz görünəndə ürəyi çırpındı. İlk dəfəydi dənizi televizorda yox, belə yaxın məsafədən görürdü. Bakıya ilk səfəriydi. Narıngül qəbul imtahanına gedirdi. Atasının qırmızı “Jiquli”si isə sonuncu dəfə Bakıdan 22 il əvvəl çıxmışdı.  Adəmin toyundan bir-iki həftə əvvəl...
 Bir az sonra Bayıl təpələrinin başındakı villalar və Teleqüllə göründü. Həyəcanı artırdı. Bu qülləni də televizorda görmüşdü. «Ata, o Teleqüllə var ha, hündürlüyü 300 metrdən çoxdur. Ölkəmizdə ən hündür tikili hesab olunur. Hündürlüyünə görə dünyada 34-cü Televiziya qülləsidir” – demək istədi,  amma Nadir dayıdan utandı.
Bayraq Meydanının yanından ötəndə isə özünü saxlaya bilmədi.
-    Ata...
-    Hə, qızım   
-    Olar burda bir az dayanaq?
-    Ürəyin bulanır?
-    Yoo, bayraq meydanına baxmaq istəyirəm... bayrağa...
-     Hə, Adəm, qaduyu alım saxla, mən də bir siqaret çəkim...
Adəm maşını saxlamaq üçün yolun sağ tərəfinə yönəldi, bu vaxt ağ “Nissan Patrul”  lap yaxın məsafədən, sürətlə, aramsız siqnal verərək keçib, dayandı. Sonra arxaya verib “Jiquli” ilə paralel saxladı. Şüşəni endirib əlllərini ölçə-ölçə qışqırmağa başladı:
-    Alə  korsan? Dönürsən “pavarodniki”ni yandır də? Debil... dəysəydi altından çıxa biləcəkdin? Hə?   
 Hər üçü bu sözləri aydın şəkildə eşidirdi. Adam bunları demək üçün dayanıbmış. Dedi, sürdü, getdi.  
Narıngülün yanaqları bayrağın qırmızı rəngdə idi. Maşını saxlatdırdığına peşman olmuşdu. İlk dəfəydi kimsə atası ilə belə danışırdı. Ümumiyyətlə, birinci kərə idi kimisə belə danışan görürdü. Adəmsə  elə bir daşa dönmüşdü.  Ağır keçən bir neçə saniyədən  sonra Nadir dayı siqaret çıxarıb yandırdı.
-    Qudurublar, tərbiyəsiz köpəy uşağı... Gəl qızım, düşək.... – Nadir dayı maşından düşdü.
-    Qızım, düş, bax, gəl...
Narıngül bir-iki saniyə tərəddüddən sonra maşından düşdü. Dünyanın ən uca bayrağı necə möhtəşəm görünürdü – ürəyi yerindən çıxırdı Narıngülün.  Məktəblərinin gözü olan Narıngül Azərbaycan tarixini əla bilirdi, Vətənini sevirdi, Azərbaycan bayrağını sevirdi. Bütün dəftərlərinin ilk səhifəsində üç rəngli bayraq çəkmişdi... Fəxarət hissi içindəki peşimançılığı da azaltdı hətta... Yenidən maşına tərəf gəldi:
-     Ata, sən də gəl, nə olar...
-    Yaxşı, Nadir dayının yanından ayrılma, mən maşını rahat yerə verim gəlirəm.
Narlngül dil açmışdı elə bil.
-    Nadir dayı, bu, dünyada ən hündür bayraqdır.
-    Ay MaşAllah!
Adəm də gəlib çatdı. Narıngül atasını görüb bir az da ürəkləndi.
-    Bayrağımızın hündürlüyü 162 metrdir. Dünyada ən hündür bayraq dirəyi hesab olunur. Ginnesin rekordlar kitabına düşüb.
-    Ayə, Adəm maşınını aparırılar...
Yol kənarındakı “Jiquli”ni evakuatora çıxarırdılar. Adəm qaçıb çatdı,  xeyiri olmadı, maşını apardılar...

***
Narıngül taksidə atasının yanında günahkarcasına oturmuşdu. Maşının şüşəsindən şəhərə baxırdı, amma bayaqkı həvəsi qalmamışdı. Hətta “Bəhrəm Gur”un heykəlinə, Dənizkənarı Bulvara belə etinasız baxdı... Elə bil min dəfə keçib burdan... Amma uşaq ki, uşaq, Qız Qalasının yanından keçəndə özünü saxlaya bilmədi
-    Mən elə bilridim, Qız Qalası daha böyük görünür... – utandı...
-    Xanım deyəsən birinci dəfədi Bakıya gəlib... – Cavan sürücü güzgüdən Narıngülə baxdı. Narıngül qızardı və daha bir kəlmə də danışmadı.

***
Onlar müvəqqəti dayanacağa maşınlardan tez gəlib çatmışdılar. Bir az sonra evakuatorun belində “Jiquli”ni gətirdilər. Narıngül ürəklənib Nadir dayıdan soruşdu
-    Nadir dayı, maşınımızı niyə bura.... belə gətirdilər ki?   
-    Nə bilim ay qızım, deyirlər, düz yerdə saxlamamışıq.
-    Onda desinlər ki, maşını burada saxlama, sür başqa yerdə saxla, lap cərimə də yazsınlar,  daha niyə bura gətirirlər ki...
-    A kişi, niyə sındırırsız? Ayə, ayə, sizinləyəm ee, niyə sındırırsız???  – Adəmin gur səsi bütün dayanacağa yayıldı. Maşını evakuatordan endirəndə qabaq buferi sınmışdı.
-    Niyə qışqırırsan, sındırırsız deyəndə, sınıqdır da...  – 25-30 yaşlı oğlan əli ilə buferi sirkələyib cavab verdi.
-    Bu sınıq deyildi axı... indicə sındırdız...
-    Bunun salamat yeri var ki...
-    Deyirəm bu sınıq deyildi...
-    A kişi bunun harasına əl vursan sınacaq da... antikvar maşın sürürsən.... sən mənim canım məni işə salma.
Part!!! – Adəm həmin adamı sillə ilə vurdu. Adam çığıra-çığıra polis postuna tərəf qaçdı. İki polis gəlib Adəmi Post Patrul maşınına otuzdurub apardılar. Adəm “Nadir, sən uşağı apar Kifayət gilə” deməyə macal tapdı.
Narıngülün gözləri qaraldı, özündən getdi. Ayılanda bibisigildəydi.
Səhər qəbul imtahanı idi. Narıngül imtaha getmək istəmədi. Dedilər, atanı sabah səhər, sən imtahandan çıxana qədər buraxacaqlar. Narıngül yenə istəmədi. Dedilər, on illik əziyyətini boşa vermə. Narıngül israr etdi. Bibisi yalvardı, əsəbiləşdi, qışqırdı... xeyiri olmadı. Səhər onu məcburən aparıb imtahan zalına buraxdılar. Məhkəmə Adəmə 5 sutkalıq cəza verdi. Narıngül 5 sutka bibisigildəki balaca otaqdan kənara çıxmadı.

***
Qayıdanda maşında ikisi idi – Adəm və  Narıngül. Narıngül  ön oturacaqda, atası ilə yanaşı oturmuşdu. Yol boyu bir dəfə də olsun maşının yan şüşələrindən şəhərə baxmadı.  Ancaq irəli baxırdı. Kəndlərini dövrəyə alan çinarlar görünəndə Narıngül ağladı! Bu altı gündə, bu qədər olanlardan sonra ilk dəfə hönkürdü Narıngül... Adəm  maşını saxladı.
-    Nə oldu qızım?
-    Ata...  – hönkürdü.  
-    Hə...
-    ... yazmadım
-     Nəyi yazmadın?
-    Suallara cavab yazmadım....
-    Niyə?
-    İstəmirəm. Mən o şəhərə qayıtmaq istəmirəm...
Adəm maşından düşüb siqaret yandırdı. Çinarlar elə doğma görünürdü ki...

Yenililklər
15.10.20
“The Role of the Personality in History” adlı VIII Uluslararası Sempozyuma davet
23.09.20
“Sufi və şeir – Osmanlı təsəvvüf şeirinin poetikası” kitabı Azərbaycan dilində nəşr olunub
23.09.20
Nobel mükafatları bu il ənənəvi qaydada təqdim edilməyəcək
23.09.20
Komiks müsabiqəsi üçün müraciətlər açıq elan edilib
23.09.20
Qazaxıstanda Əbdürrəhim bəy Haqverdiyev və Üzeyir Hacıbəyliyə həsr edilən beynəlxalq konfrans keçiriləcək
23.09.20
Birinci vitse-prezident Mehriban Əliyeva Bülbülə qəsəbəsindəki Uşaq İncəsənət Məktəbinin yeni binasının açılışında iştirak edib
22.09.20
Azad Qaradərəlinin kitabı rus dilidə çap olunub
22.09.20
“Mədəniyyət/Culture” jurnalının növbəti nömrəsi işıq üzü görüb
22.09.20
A.P.Çexovun Yaltadakı ev muzeyindən reportaj
21.09.20
Anar Kərimov Mədəniyyət Nazirliyi yanında İctimai Şuranın seçki komissiyasının yaradılması haqqında əmr imzalayıb
21.09.20
Kənan Hacı “MÜCRÜ” ədəbiyyat dərgisinə baş redaktor təyin edildi
21.09.20
Açıq səma altında tamaşa nümayiş olunub
21.09.20
"Naxçıvan ədəbi mühiti Şərq-Qərb kontekstində" təqdim edilib
17.09.20
Ədəbiyyat İnstitutu vakant vəzifələri tutmaq üçün müsabiqə elan edir
17.09.20
"H`Ayların və Armenlərin mənşəyi" kitabı nəşr olunub
16.09.20
Nadir Əzhəri - Modernizm və postmodernizmin xüsusiyyətlərinin müqayisəsi
16.09.20
Buker mükafatının qısa siyahısı açıqlanıb
15.09.20
Mədəni İrsin Qorunması, İnkişafı və Bərpası üzrə Dövlət Xidmətinə rəis müavini təyin edildi
15.09.20
Dövlət qoruqlarını idarəetmə səlahiyyəti Dövlət Turizm Agentliyinin Qoruqları İdarəetmə Mərkəzinə verilib
14.09.20
“Filologiya və sənətşünaslıq” jurnalının növbəti nömrəsi nəşr olunub
14.09.20
Seymur Baycanın romanı Polşada nəşr edildi
14.09.20

Hacı Zeynalabdin Tağıyevin heykəli yaxın zamanlarda ucaldılacaq

14.09.20
İtaliyada 77-ci Venesiya kino festivalına yekun vurulub
11.09.20
Soylu Atalı - Doğruluğun halallığı
11.09.20
Şəkidə qədim yaşayış məskəni aşkarlanıb
11.09.20
“Azərbaycan mədəniyyətində akkulturasiya və folklor” kitabı çapdan çıxıb
11.09.20
Venesiyada ikinci “Müqəddəs Markın şiri” mükafatı təltif olunub
10.09.20
Umberto Eko - Ədəbiyyatın bəzi funksiyaları haqqında
10.09.20
Vaqif Yusifli - Elm fədaisi
10.09.20
"Axtarışlar" jurnalının yeni sayı çıxıb
09.09.20
Etimad Başkeçid - “Dost”, “dost” deyə-deyə...
09.09.20
Anar Şamil - Mənimlə danış
09.09.20
Fərid Muradzadə - Ünvana çatmayan əmanət 
09.09.20

Belçika şirkəti Fikrət Əmirovun “Kor ərəbin mahnısı” əsərinin mənimsənilməsini etiraf etdi

08.09.20
Elmi-fantastika janrında hekayə müsabiqəsi elan olunub
08.09.20
Kosmosda uzun müddət qalmağın baş beyinə təsiri araşdırılıb
08.09.20
Təranə Vahid - Uçan buludlar
08.09.20
Elnura Cavadzadə - Eybəcərlər anası
08.09.20
Azərbaycan filmi Venesiya Film Festivalında nümayiş olunacaq
07.09.20
Kamal Abdullanın "Dədə Qorqud poetikasına giriş" kitabı Türkiyədə nəşr olunub
©2012 Avanqard.net Muəllif hüquqları qorunur. Məlumat internet səhifələrində istifadə edildikdə müvafiq keçidin qoyulması mütləqdir.