Tanınmış yazıçı-tərcüməçi Cəmşid Cəmşidov “Avropa Nəşr Mətbuat Evi”nin təsis etdiyi “Ən yaxşı vətənpərvər tədqiqatçı” qızıl medalı və diplomu ilə təltif olunub.

“Avropa Nəşr Mətbuat Evi”ndən AZƏRTAC-a bildirilib ki, C.Cəmşidov milli-mənəvi dəyərlərimizin zənginləşdirilməsində fəal iştirakına, Azərbaycan-İtaliya ədəbi əlaqələrinin inkişafında müstəsna yaradıcı fəaliyyətinə, italyan dilindən orijinal bədii tərcümə əsərlərinə və məqsədyönlü elmi–publisistik araşdırmalarına, həmçinin gənclərdə vətənpərvərlik duyğularının aşılanmasında xüsusi xidmətlərinə görə bu mükafatlara layiq görülüb.

C.Cəmşidov İtaliya ədəbiyyatının görkəmli nümayəndələri, o cümlədən Dante, Petrarka və Bokkaçço kimi klassiklərin əsərlərini, C.Verqa, L.Kapuana, Q.D`Annuntsio, L.Pirandello, D.Butsati, A.Moravia, İ.Kalvino, A.Tabukki, U.Eko və digər tanınmış nasirlərin bir çox hekayə və novellalarını, L.Merkantini, E.Montale və S.Kvazimodo kimi şairlərin poeziya nümunələrini dilimizə çevirib. O, Şimal intibahının klassiki Rotterdamlı Deziderius Erazmusun “Axmaqlığın tərifi” satirasının, Azərbaycan Respublikası Prezidentinin Sərəncamı ilə çap olunan 150 cildlik “Dünya ədəbiyyatı kitabxanası” seriyasından “İtalyan ədəbiyyatı antologiyası”nın tərcüməçisidir.

Tanınmış tərcüməçi, həmçinin Azərbaycan-İtaliya ədəbi əlaqələrinə dair bir sıra orijinal məqalələrin müəllifidir.