Tanınmış qırğız yazıçısı Çingiz Aytmatovun kitabı Bakıda latın əlifbasında çap edildi.

Bakı Kitab Klubunun nəşr etdiyi kitaba ədibin «Gün var əsrə bərabər» (qırğızca «Kılım karıtar bir kün») romanı, «Əlvida, Gülsarı!» və «Cəmilə» povestləri daxil edilib.

«Gün var əsrə bərabər» romanı 1980-ci ildə o dövrlərin ən radikal jurnalı sayılan «Novıy mir» jurnalında işıq üzü görüb. Dərc olunan gündən öz qeyri-adiliyi ilə bütün Sovet respublikalarına ildırım sürəti ilə yayıldı və cəmiyyətdə böyük diskussiyalara səbəb oldu.

Yazıçı əsərinə dəmir yolu ilə qaçan bir tülkünün təsviri ilə başlayır... Sonradan məlum olur ki, bu təsadüfi deyilmiş... Yeri düşmüşkən, əsərin qüdrəti də elə ondadır ki, əsərdə söhbəti gedən bütün şeylərin öz mahiyyəti, anlamı var, hər bir xırda detallar belə sonradan məna kəsb edir... Əsəri ölməz edən daha bir detal da ondan ibarətdir ki, məhz bu mükəmməl əsər dünyaya manqurt sözünü gətirdi, o günlərdən bəri bu söz ən populyar söz kimi insanların beyninə həkk oldu... /oxuzali.az/