Gənc yazar Cəlil Cavanşirin “Qadın corabları” kitabı nəşrdən çıxıb. O, yeni kitabı ilə bağlı fikirlərini bölüşüb:

-Cəlil, “Qadın corabları”nın yazı prosesi nə vaxtdan başlamışdı?

-Əsəri iki il əvvəl yazmağa başlamışam. Başlayanda “Afroditanın göz yaşları” adını nəzərdə tutmuşdum. Çünki yunan mifologiyasından müəyyən elementlər vardı. Sonradan yazı prosesində ixtisarlar elədim və fikrimi dəyişərək romanın adını “Qadın corabları” qoydum. Bir illik fasilədən sonra yenidən yazı prosesinə başladım. Bu ilin aprelində roman yekunlaşdı və redaktə prosesi başladı. Romanın mesaj vermək, çağırış etmək iddiası yoxdur. İnsanlara mesaj vermək istəməmişəm. İnsanlara özlərini göstərməyə çalışmışam ki, siz busunuz.

-Bu əsəri sənin yazdıqlarının ən mükəmməli hesab etmək olar?

-Mənim indiyə qədər yazdıqlarımın ən mükəmməli şeirlərimdir. “Qadın corabları” yazdığım ən yaxşı nəsr əsəridir. Azərbaycanda bu üslubda, bu strukturda, bu düşüncədə, etiraz formasında roman yazılmadığını düşünürəm. Yenə də son söz oxucuların və ədəbiyyatşünaslarındır. Amma mən öz romanımdan çox razıyam və burda nəyi necə etdiyimi bilirəm.

-“Qadın corabları”ı çıxmamış onun haqqında yazılar yazıldı, hətta sosial şəbəkədə adla bağlı istehza və kinayəli fikirlər də var idi. Kitab isə hələ bu gün çıxıb. Yəqin ki, bu da sənin taktikan idi...

-Burda mən öz menecerlik qabiliyyətimi də sınağa çəkirdim. Öz menecerliyimi özüm elədim və gördüm ki, alınır. Əsərin adı da sırf qıcıq yaratmaq üçün “Qadın corabları”dır. Əslində bu həm də oxucuları qıcıqlandırmaq və maraqlandırmaqdır.

-Onda növbəti əsərinin adı “Büstqalter” olsa, təəccüblənməyək də...

-Mən hər sahədə təxribat eləmişəm və yazıyla bağlı çox təxribatlarım olub. Bu sonuncu təxribatım ola bilər. Çünki artıq yaş da imkan vermir təxribatçılığa.

-Oxucunun bu kitabdan öyrənəcəyi nə var?

-Oxucu bu kitabı oxuyub ədalətli olmağı, xəyanət etməməyi, aldatmamağı, təmiz yaşamağın necə gözəl bir hiss olduğunu, eyni zamanda azadlığın və sərbəstliyin insana heç bir başıaşağılıq gətirmədiyini öyrənə bilər.

-Kitabın satışı nə vaxtdan başlayacaq?

-İlk nüsxəni bu gün götürdüm. Yəqin ki, satış kitabın təqdimatıyla eyni gündə başlayacaq və bütün kitab mağazalarına paylanacaq.

-Qiyməti neçəyədir?

-Səhifəsinə, keyfiyyətinə görə o qədər də baha deyil. Kitabın dizaynı rəssam Vasif Səftərovla işlənilib. Kitabın üz və arxa qabığını, içərisindəki illustrsiyaları o işləyib. Burdakı rəsmlər də kitabla bağlı mesaj verir. Mənə elə gəlir ki, çəkilən əziyyətə görə 4 manat çox ucuzdur.

-İndiyə qədər kitablarında gəlir götürmüsən?

-İndiyə kim 6-7 il ərzində çıxan kitablarımdan üst-üstə 2000 manat qazancım olub.

–Yeni kitabın tirajı nə qədərdir?

-İlkin olaraq 500 tirajdır. 500 kitabın sentyabr-oktyabra qədər satılacağına inanıram. Fürsətdən istifadə edib mətbuatdakı dostlarımı, oxucularımı, mənə hörmət edən insanları ayın 20-də saat 16-da Kitabevim.az mağazasındakı təqdimata dəvət edirəm. Gəlin söhbətləşək. Təqdimatda çox maraqlı sürpriz qonaqlar, xalq artistləri, sevilən aktyorlar, sənətçilər də ola bilər. Sürpriz etmək mənim işimdir. /AzNews.az/