Dünyanın nəhəng yazıçılarının o dünyadan məktubu

 
Ey gənc və istedadlı şairlər,
noolsun ki axirət dünyasında uyuyuruq,
siz bizi oxuduğunuz  kimi
biz də sizin şeirlərinizi oxuyuruq...

Əvvala, biləsiz ki, biz burda
yağışdan qorunmaqçün buludların
üstünə qalxmış adamlar kimiyik.
Hələ Allahın hüzuruna aparılmamışıq,
hələ bilmirik ki, ölüyük, ya diriyik.

Hərçənd bunu da biləsiz ki,
dirilik suyunun mənsəbi qiyamət gölüdü.
Ölməzlərin hamısı ölüb,
dünyanızda qalan beş-altı uzunömürlüdü.

Hərdən sizin dünyanızdan bura
gənc yaşında gələn şairlər
öz şeirlərini göstərirlər bizə rəy üçün.

Onlar da əbədi sevgidən yazırlar:
avazları şirindi, mənaları dərindi.
Ancaq bir sualımıza cavab verə bilmirlər ki,
görəsən,əbədiyyətin neçə yaşı var indi?

Ey gənc və istedadlı şairlər,
bu qədər də realist olmayın,
hər şeyi gözünüzə təpməyin:
O qadının ki, əllərini öpmək istəməzdiz,
heç onun dodaqlarını da öpməyin.

Və bu qədər romantik də olmayın,
dünyanız həm güdə, həm gədə, həm gidi:
Bilin və agah olun ki, əbədi olan şeylərdən
ən qısa ömürlüsü sevgidi.

Yəni ki, gün gəlir bezirsən:
Məsələn, ilk öpüşü gizlincə oğurlayırsan,
ikincisi üçün yalvarırsan,
üçüncüsünü tələb edirsən,
dördüncüsünü soruşmadan alırsan,
beşincisini candərdi qəbul edirsən,
sonrakılarına isə dözürsən.

Düzdü, gözəl əllər çox səltənətləri devirib,
gözəl ayaqlar tarixin çox səhifələrini çevirib...
Amma yataq təkcə ifliclərin vətənidi,
qadının kişiyə verə biləcəyi ən xırda şey bədənidi.

Ey gənc və istedadlı şairlər, ey kimsəsiz kimsələr,
günahların cürbəcür ayinlər şəklində icra olunduğu dünyanızda
vağzallar daha səmimi öpüşlərə şahiddi, nəinki nikah idarələri,
xəstəxanalar daha səmimi dualara şahiddi, nəinki kilsələr.

Bilin və agah olun:
sevgi o deyil ki, qadına gül verirsən, iyləyir,
sevgi odur ki, bütün günü benzindən danışmağına
heyran-heyran qulaq asır qadın.

Ey gənc və istedadlı şairlər,
bilin və agah olun:
Xoşbəxtlik – səni axtaranı tapmaqdı.
/1937.az/