Ümumilikdə bu, çox ağrılı söhbətdir. Düşünmək, düşündürmək üçün beyin partladası bir mövzudur. Ancaq xalqımız  hər bir ideoloji mövzuya ironik yanaşdığından bu söhbətə də nisbətən digər rakursdan baxmaq lazım gəlir.
Mən internet söhbətləri haqqında bir çox yazılar yazmışam. Bəzi yazılarıma görə “tənqid”lər də eşitmişəm.
Bir zamanlar çatda tanış olduqları oğlanlara görə əyalətlərdən Bakıya “mühacirət” etmiş qızlarımızdan bir neçə yazı yazmışdım. Dostlarımdan bəziləri axırda üzünü mənə tutaraq dedi ki, bəsdir o qızlardan yazdın, axırda onların birini sənə zorla ərə verəcəklər. Mən də bu qeyri-demokratik məsələyə görə o mövzuda yazmağı saxladım.
Bu arada internetlə bağlı bir neçə qərar (fətva) verilib Şərq ölkələrində. Bu qərarları eşidəndə düşündüm ki, görəsən, islam ölkələrində bu özünüqapama hansı məqsədlərlə həyata keçirilir. Görəsən, niyə özümüzü kimlərdənsə gizləmək istəyirik?
Bəzi müsəlman ölkələri ilə bağlı xırda bir araşdırma aparsaq, görərik ki, porno saytlara girişi bağlasalar da, bu ölkələrdə porno saytlara giriş sayı statistik nəticələri alt-üst edir.
Hətta bəzi ölkələrdə siğə məsələsi ilə bağlı son zamanlar internet saytları açılıb. Girirsən sayta və xoşuna gələn zənənin siğəsini internet vasitəsilə özünə oxutdurursan. Yəni bir molla, üç manat pul və bir kəllə qənd.
Bizim gücümüz ancaq “Toy olsun”, ya da “Onun yarısı” kimi verilişlər açaraq insanları evləndirməyə çatır.
Məni düşündürən daha bir məsələ isə Səudiyyə Ərəbistanında verilmiş növbəti qanun (fətva) oldu. Verilmiş fətvaya görə qadınlar yanlarında kişi (erkək) olmadan internetə daxil ola bilməzlər. Bu qərarı hansı rakursdan araşdırsaq, mübahisə-müzakirə mövzusu etsək hansı ağılla verildiyi yenə də çatmayacaq bizə.
Bu şəriət dostlarımız, görəsən, nə yeyirlər, nə içirlər, nə çəkirlər? Əsas məsələ bax budur!
Deyək ki, iranlı dostlarımız siğə saytı açdı. Səudiyyə Ərəbistanından da bir qadın girib bura öz “CV”- sini yükləmək, öz bəxtini açmaq istədi. Axı Səudiyyə Ərəbistanının “Toy olsun”u və ya “Xoşqədəm”i yoxdur ona bir qismət tapsın. Əgər S.Ərəbistanında bir qadın internetə yanında kişi (erkək) ilə daxil olacaqsa nəyinə lazımdır o siğə saytı ?
Yəqin, bunu düşünməyib Sədiyyə Ərəbistanlı dostlarımız.
Hər bir halda bu addım insanları inkişafdan geri salacaq. Onsuz da İslam ölkələri inkişafdan ciddi şəkildə geri qalırlar. Bir dənə normal inkişaf edən İslam ölkəsi yoxdur dünya xəritəsində.
Bu gedişlə də heç olmayacaq, deyəsən. /1937.az/