“Kitabevim.az” kitab marketində gənc satirik şair Yusif Nazimin “Şou dünya” adlı şeirlər kitabının təqdimat mərasimi keçirildi. 

Mərasimdə ədəbiyyat adamları, şairin müəllimləri, tələbə yoldaşları və digərləri iştirak edirdilər. Yusif Nazim qonaqları salamladıqdan sonra, “Sərçə sevgisi” şeirini dedi. Daha sonra tədbirin aparıcısı gənc şair İntiqam Yaşar qonaqlara söz verdi. Tədbir iştirakçıları Yusif Nazim haqqında xoş sözlər söylədilər, bəzi şeirlərinə fikir bildirdilər, onun satirik şeirlərinin özünəməxsus üslubu ilə seçildiyini vurğuladılar.  

Bəzi iştirakçılar tərəfindən şairin şeirlərindən də səsləndirildi.  Şairin “Tarverdi dayı” satirası, “İnsan bu dünyada hər şeydən bezir” adlı şeiri marağa səbəb oldu. Sonda Yusif Nazim bütün tədbir iştirakçılarına təşəkkürünü bildirdi, məclisin təşkil olunmasında göstərdikləri köməyə görə şair dostları İntiqam Yaşara və Gülbala Dadaşa, eləcə də “Kitabevim.az” kitab marketinin kollektivinə minnətdar olduğunu bildirdi.

Qeyd edək ki, Yusif Nazim 2011-ci ilin may ayında M.Ə.Sabirin vəfatıya əlaqədar keçirilən Ümumrespublika üzrə “Satira və qəzəl” müsabiqəsində   fəxri  diploma, 2015-ci ildə Azərbaycan Respublikasının Prezidenti yanında “Bilik Fondu”nun həyata keçirdiyi “Vətənin pərvəri ol” adlı müsabiqdə isə şeir nominasiyası üzrə “Sərçə sevgisi” adlı şeiri ilə I yerə layiq görülüb.

Artpress.az